Sut la direcziun dad Andrea Kuratle preschenta il Chor facultativ da la scola chantunala ils 30 e 31 da mars il Requiem da Mozart. Ils dus concerts han lieu en la Baselgia Son Martin a Cuira, mintgamai a las 20:00. La part d'orchester surpiglia la «Kammerphilharmonie Graubünden».
Impressiuns d'ina prova
-
Bild 1 von 5. Bildquelle: BKS.
-
Bild 2 von 5. Bildquelle: BKS.
-
Bild 3 von 5. Bildquelle: BKS.
-
Bild 4 von 5. Bildquelle: BKS.
-
Bild 5 von 5. Bildquelle: BKS.
Project final per Andrea Kuratle
L'organist, pedagog da musica e dirigent uriund dad Igis dat giu la batgetta dal chor suenter quests dus concerts. Per ses project final saja stà impurtant da tscherner in'ovra pli gronda che stat spezialmain a cor ad el. Da tscherner in'ovra classica saja dentant era stà collià cun ina tscherta ristga.
Jau na saveva betg propi sch'ils giuvenils s'annunzian per quest project. Ussa che jau sent l'entusiassem ed il plaschair ch'els han vi da l'ovra, ma commova quai fitg.
Chantar en in chor fa bain – e quai ord differents motivs
Las provas dal Chor facultativ da la scola chantunala han mintgamai lieu la gievgia sur mezdi. Per las scolaras ed ils scolars valia en mintga cas la paina da scursanir ina giada l'emna la pausa da mezdi per ir a chantar. Sper la part musicala procuria quest inscunter musical era per ina pluna fitg bellas amicizias.
Igl è fitg bel cura ch'ins po chantar l'atgna vusch, ma era d'udir sco che las singulas vuschs sa maschaidan.
I saja era bel da chantar in'ovra in pau pli greva ch'ins audia betg mintga di. Tras questa sfida possian ins emprender enorm bler.