Golden Vultures – «Black & Blue»
La gruppa Golden Vultures da Lugano sa cumpona dal Radio-dj e chantautur Yari Copt e Yannick Rinvi (Those Furious Flames), Andrea Zinzi (Make Plain), Eveline Lucchini (Animor), Sebastian Rigo (Eleonor) ed Enea Adami. Quels musicists che han ensemen rimnà en lur agens projects bun 500 concerts live e 10 albums da studio èn 2021 sa mess ensemen ed han dapi lura gia pudì sunar avant gruppas cun renum internaziunal sco per exempel Papa Roachm Wolfmother ubain Deep Purple. Medemamain han els fatg turnea tras l’Europa e l’America.
Lur chanzun «Black & Blue» duai esser in messadi plain forza davart resilienza e renaschientscha. Per che la chanzun tuna sco rock criv co quai che la band s’imaginescha han els registrà la chanzun live. Tematicamain tracta il text cumbats dal mintgadi e culps dal destin – focusescha dentant sin il desideri dad adina puspè star si.
Durant il mais avrel emettan ils emetturs da SRF3, Couleur 3, Rete Tre ed RTR la chanzun «Black & Blue» en l’entira Svizra.
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch.
