Ils dus dad Omisdus han il 2024 publitgà lur emprima EP «Scoletta». Sin quella èn Gino Carigiet e David Friedli sa fatschentads cun temas politics e da la societad. Lur nova platta sa concentrescha sin sentiments e – co il titel «Turnus» di – sin circuls che sa repetan. Per exempel en la chanzun «Per tei» che saja tenor ils musicists lur emprima chanzun d’amur che sa fatschenta cun la dumonda tge che capita cun ils sentiments per ina persuna.
- Per tei
- Primavera
- Cara mumma
- Giavisch
- Bye Bye Bye
- Jukebox
- Cara mumma (Stripped Down Version)
Il circul sur tut las set chanzuns da la EP descriva sentiments ed emoziuns ch’in carstgaun fa atras durant sia vita e che sa repetan adina puspè – amur, odi, tristezza, conciliaziun e cumià. Uschia daventa lur musica actuala pli persunala e drizzada pli fitg en l’intern dals musicists e pli pauc envers temas “externs” da la societad. Dentant datti cun «Jukebox» tuttina er anc ina chanzun pli politica sin «Turnus». En quella tematiseschan els il plaschair anticipà avant in viadi en l’America cun tut las pussaivladads e la dischillusiun suenter il viadi.
Tar «Turnus» tematisain nus sentiments ed igl ha uschia forsa era da far cun ina vart pli persunala da la band.
La musica sa preschenta lura en in vestgì da pop cun elements da chantauturs ed inspirà tranter auter dad ABBA – quai audan ins pulit bain en la chanzun «Cara mumma». Els restan fidaivels a la lingua rumantscha e melodias agreablas e divertentas.
Tgi èn Omisdus?
D’ina amicizia e l’amur communabla per la musica è il project «omisdus» naschì cun lur album da debut il 2018 «Clar e stgir». Be dus onns pli tard han els publitgà in agen cudesch da maletgs «Giugiu & Roro». En quella istorgia accumpagnada da la musica da Gino e David entaupa in capricorn grischun in urs bernais – in’istorgia davart amicizia e toleranza per tudestg e rumantsch. Dapi lur fundaziun han els dà concerts tranter auter al Gurtenfestival a Berna ubain al Blue Balls Festival a Lucerna. E questa stad sunan els er a l’Open Air Lumnezia. 2024 è lur EP «Scoletta» cumparida e l'avrigl 2026 «Turnus».
