Siglir tar il cuntegn

Header

cuntegn

Program Open Air Lumnezia Da Fantastischen Vier, Breitbild enfin Beatsteaks

L’auter onn ha il festival lieu per la 37avla giada en Lumnezia. Gia uss savain nus tgi che vegn a star sin tribuna durant ils trais dis festa.

video
Line-up OAL 2023 – La pli gronda festa dal Grischun
Or da RTR Social dals 08.12.2022.
laschar ir. Durada: 45 Secundas.

Il temp dals festivals è gnanc ditg a fin e gia vegnan ils programs dal 2023 publitgads. Uschia ha era il comité d’organisaziun da l’Open Air Lumnezia preschentà ses line up – u almain 11 ed insaquants «surprise acts».

Uschia tuna l'OAL 2023

Regiunal, svizzer ed internaziunal

Era quest onn derivan bleras musicistas e musicists da la Svizra. Il sulet indigen fin uss è Breitbild, sco gruppa finala la gievgia saira. A bain inqual è anc lur concert da giubileum en la halla da la citad da Cuira en memoria.

Medemamain la gievgia saira po il public sa legrar sin la chantadura vallesana Stefanie Heinzmann. Suenter gronds success naziunals sco er en l’Europa ha ella il 2023 sia premiera a l’OAL.

Per la generaziun giuvna tranter ils entusiasts ed las entusiastas dal rap svizzer èn Monet192 e Nativ envidads da dar concert a Degen. Ma era rock e pop svizzer èn represchentads. Quai cun la chantautura dal Son Gagl Joya Marleen, il chantautur turitgais Andryy e la gruppa da rock Annie Taylor.

audio
Line-Up 2023
ord Actualitad dals 08.12.2022. Maletg: RTR
laschar ir. Durada: 4 minutas 51 Secundas.

Ils Headliners 2023

Quels ch’emplainan l’areal dal festival avant tribuna fin l’ultim plaz èn dentant las grondas bands, ils acts internaziunals cun il pli grond renum. Tar la 37avla ediziun èn quai trais acts tudestgs cun Die Fantastischen Vier, Robin Schulz, Beatsteaks ed in duo englais Royal Blood. Pia gruppas etablidas, gruppas che han dapi blers onns per part schizunt decennis grond success e ch’èn er en nossas regiuns enconuschentas – forsa cun excepziun dal duo englais.

In recept cumprovà

Trais gruppas da rock, trais acts da pop, quatter giadas hip hop (per giuven e vegl) ed in DJ. Era quest onn emprova l’Open Air Lumnezia dad avair ina buna maschaida tranter geners e generaziuns. Senza pli grondas surpraisas ubain experiments e fin uss era cun be trais dunnas. In recept ch’è sa cumprovà ils ultims onns e che ha pliras giadas procurà per festivals vendids ora. Ins dastga dentant anc esser mirveglius tgi che sa zuppa davos quels «surprise acts». Cura che quels vegnan tradids n’è anc betg cler.

Or da l'archiv

video
Openair Lumnezia 2022 - Aftermovie
Or da RTR Social dals 26.07.2022.
laschar ir. Durada: 2 minutas 4 Secundas.

RTR actualitad 11:00

Artitgels legids il pli savens

Scrollar a sanestra Scrollar a dretga