Musical «Plaun Salter» a Danis - Plaschair e tensiun – las ultimas uras avant la producziun

Durant che la halla da gimnastica è anc vita, vegn en il plaun sutterran da la chasa da scola a Danis guardà ch'il costum e la frisura stettian. La tensiun, ma cunzunt il plaschair, èn da sentir tar ils participants e las participantas dal musical «Plaun Salter». En las gardarobas audan ins – tranter baterlim e las risadas – er in u l'auter tun per tegnair chaud la vusch.

Igl è gia la terza producziun avant radund 270 persunas. Quai munta era ch'ils chantadurs e las acturas han gia in pau rutina ed in bun sentiment. Quel hajan els era perquai che las davosas duas producziuns sajan stadas in success. Mo da questa segirtad na dastgain ins betg laschar tschorventar, di Flurin Caduff ch'è chantadur da professiun e che gioga l'eremit – ina da las rollas principalas:

Ch'in musical sco «Plaun Salter» na fascinescha betg mo chantaduras e chantadurs rutinads, mussa la roschada d'uffants che sa participescha.

Avant var trais onns ha la famiglia Caduff gia preschentà il toc «Frisal – Frisal». I saja stà impurtant ch'il nov musical na saja betg ina copia, schegea ch'el vegnia er ord la plima da lur bab Armin, din Flurin Caduff sco era sia sora Maria Catrina Albin-Caduff. Quai para d'esser reussì ad els, perquai ch'il public ha mussà ses plaschair cun star sin pe ed in grond applaus suenter la producziun.