Pilar Vega è ina maschaida speziala. Ses bab e tat èn da Kuba, sia tatta da Panama e sia mamma dal chantun Turgovia. S’inscuntrads èn ses geniturs dentant a Miami ed han silsuenter vivì en il Tessin. La giuvna chantadura abitescha ussa a Turitg ed ha studegià psicologia a Losanna. Bleras differentas influenzas pia che sa uneschan qua. Ses scolast da musica ha motivà ella da chantar ed en in chor ha ella lura cumenzà a chantar. Sia mamma haja dentant adina puspè guardà ch’ella na perdì betg il fil.
Suenter ina curta pausa musicala durant ses studi ha ina mala relaziun puspè manà enavos ella tar la musica. Ella ha cumenzà a scriver atgnas chanzuns e fa quai fin oz. Per exempel sia nova single «Deja vu» ch’è la selecziun da l’acziun Mx2 – tuts per in dal favrer.
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch.
