Scriver e rapportar da tut quai che capita ed occupa la populaziun en Engiadina è la professiun da Nicolò Bass dapi stgars 20 onns. Cun ses artitgels en rumantsch vallader e tudestg contribueschia el er ina part a las mintgamai trais ediziuns l’emna che la gasetta Engadiner Post / Posta Ladina edescha. Quella lavur fetschia el cun gronda passiun. E l’impurtanza da la gasetta per la regiun è tenor l’Engiadinais fitg gronda.
La Posta Ladina / Engadiner Post ha er ina gronda tradiziun e tutga tar l’Engiadina sco il plain in pigna e la biera da Tschlin.
La gronda part dals temas vegnian da la glieud ch’ins inscuntra per via e quai è er la plivalur d’ina gasetta regiunala. Nicolò Bass enconuscha entant er blera glieud en la regiun. El è creschi si a Zernez cun trais fragliuns plis vegls, ha lavurà plirs onns en Engiadin’Ota ed è entant dapi 25 onns da chasa en Engiadina Bassa. L’emprim sin territori da Valsot, uss cun sia dunna a Scuol.
Sper il scriver e rapportar tutga er il commentar tar sia lavur. Tut tenor tenuta e temas dettia er tranteren reacziuns negativas. Cun quellas hajan ins dentant simplamain da savair viver.
Svilup adina pli svelt
La gronda sfida dal schurnalissem regiunal è dapertut il medem e vegn er influenzada tras la digitalisaziun. Adina damain persunas èn prontas da pajar per schurnalissem da qualitad, percunter vul adina dapli glieud consumar las infurmaziuns en la rait. La purschida online vegn perquai schlargiada sin differents chanals er tar la Posta Ladina.
Ultra da quai vegnia er anc tiers la sfida da l’intelligenza artifiziala tar sia lavur, accentuescha il bab da dus uffants creschids.
«24 / 7 – adina schurni»
Sco schurnalist d’ina gasetta regiunala, in che viva er en la regiun, è Nicolo Bass conscient ch’el è adina schurnalist e quai er durant ses temp liber. En quel ha el gia adina fatg gugent musica – er quai cun passiun. Saja quai en la societad da musica Scuol u er en la furmaziun dals «7 Nanins». Insumma, sch’i dat project pli gronds en la regiun, è el savens er da la partida en l’organisaziun. Dentant bunamain mai al timun.
Jau na sun betg il president, mabain il meglier vice-president. Pli gugent sun jau quel che stat davosvart e di als auters tge ch’è da far.
Oriundamain ha Nicolò Bass emprendì d’ir enturn cun cifras. El ha fatg in emprendissadi mercantil en in biro fiduziari. En la vegliadetgna da 21 onns ha el suenter surpiglià ina plazza tar il circul da Ramosch cun las pli differentas lezias. Cumenzà tar uffiziant da scussiun e falliment, sur controllader da vivondas fin il manar la cumissiun da tutela.
Sco egualisaziun d’ina lavur magari pesanta ha el er lavurà per Tschlin turissem, nua ch’el ha gidà a sviluppar per exempel la marca «Bun Tschlin». La scolaziun da marketing absolvida al haja adina puspè gidà per fundar ses agen affar u er per co-organisar gronds eveniments en la regiun, sco per exempel Scuol Classics.