(sursilvan) En zuler schai in migliac cun pupi dils schanghetgs da Nadal. Quei pupi ei per part tschughigliaus e per part scarpaus, tut tenor tgi che ha aviert. El e zacons cartuns dasperas ein semtgai per dismetter. En stiva dat il pigniel vinavon ina tempra tut speciala. La sera vegnan las candeilas envidadas ed ei vegn aunc cantau zacontas canzuns. Nadal ei vargau, denton buc naven.
Semegliont eis ei cun il raquent da Nadal tier igl evangeli tenor Lucas. Igl affon ei naschius, buc dapli e buc dameins. Negin applaus, buc dispet in silenzi magic, zacons pasturs che vegnan sperasvi. Pia negina pumpa, mobein in ver affon. In che ha fom, in che ha freid, in che bragia e sgregna.
Nus savein buc, sche Jesus ei staus in affon ruasseivel. La Bibla raquenta nuot. Mo ella cuschenta era buc ch’igl ei stau in ver carstgaun, in ver affon. Tenor Lucas ei igl affon vegnius enfaschaus e mess el pursepen. Daco buc in affon che sgregna?
Forsa devan Maria e Giusep vidaneu igl affon per empruar da quitar el. Tgisà sch’els eran surdumandai, savevan buc co dumignar. Speravan ch’igl affon durmessi finalmein. Podà che quei ei stau per els il mument dalla preschientscha divina: nuot maiestus, mobein semplamein stregn e real.
Pia negina pumpa, mobein in ver affon. In che ha fom, in che ha freid, in che bragia e sgregna.
In affon che sgregna selai buc idealisar. Quei pretenda bia, interrumpa ni dictescha schizun il mintgagi, ha pauc tempra festiva. Mo Dieus ei tuttina vegnius, forsa gest era per gir: Jeu sun buc in’idea, mobei reals. Jeu sun buc ina risposta, mobein in clom.
Uss suenter Nadal ein ils gronds plaids exprimi, las canzuns pil pli cantadas. Ei va en direcziun da mintgagi, anavos stat magari in tec in disuorden, ina stauncladad – cartuns e pupi en zuler. Mo forsa entscheiva Nadal gest cheu. El mument, nua che Dieus ei buc pli pachetaus en bi e bein. Nua ch’ei po era vegnir stregn, nua ch’ins capescha buc tut.
Il pupi dils schanghetgs en zuler fa endamen: Enzatgi ei vegnius – buc prefetgs, buc da bass, mobein reals. Pia, Dieus vegn buc mo el silenzi, mobein era el sgargnir. Buc mo ella pasch, mobein amiez nossa veta. Ed el stat – era cu Nadal para dad esser vargau.
