(vallader) Chi va plan, va san e lontan! Uschea dischan nonas, bazegners ed eir bleras otras persunas radschunaivlas. Oter co nonas e bazegners da lur dis da giuventüna nu sun blers abiadis plü adüsats da chaminar per ragiundscher ün böt plü dalöntsch davent. Culla posta, cul tren, cun l’aviun e sainz’oter cun l’auto currina da piz a chantun, ed intant cha nus giain sco nars, mantgnaina contact grazcha als mezs da comunicaziun moderns. Nus discurrin, scrivain messagis, quia svelt ün smiley, là ün poldschin amunt e tanteraint dafatta ün courin. Da la fin d’eivna a Paris, Londra o Barcelona tramettaina ün selfie o eir duos.
Chi va plan, va san e lontan! – Eir schi’s doda minchatant quista frasa, nu s’affa’la cun nos temp. Nus giain svelt, plü o main san e magara fich lontan. Avant co esser rivats, eschna fingià darcheu davent.
Chi va plan, va san … – Forsa han eir pervi da quai pelegrinadis moderns conjunctura ota. I’s decida consciaintamaing d’ir plan, nempe a pè. I’s voul esser avert sül viadi: verer che chi crescha sper il truoi, dudir l’utschè chi annunzcha l’alba, contemplar l’aual chi schuschura, inscuntrar cun avertezza ad oters viandants sco als abitants da las cuntradas chi’s scuvrischa chaminond, gnir tanteraint quiet o cumanzar a chantar, ingrazchar a Dieu per tuot quai creà tant bel (e bain fittà). O eir be pel fat chi s’es eir quista saira rivà san e salv, là ingio chi’s resta per la not.
Il viadi nun es forsa il böt, ma cuntegna ün böt in sai stess, passà ed ün avegnir tschüffan sen, vegnan reconciliats d’üna benedicziun inaspettada.
Chi va plan, va san … – Plü bod nun as vaiva la schelta, las sendas nu d’eiran adüna sgüras, ils peis faivan eir quella jada fingià mal. Sco cha nus imprendain d’essers umans chi d’eiran in viadi da temps biblics, es il viadi extern sfadius e suvent eir collià cun ün viadi intern, la s-chüra val daplü co üna cuntrada cun pac sulai, la pas-chüra verdainta bler daplü co ün lö al qual chi’s fa gugent la posa cun sia scossa e l’aua frais-cha üna chi dà propa rinfrais-ch a si’orma (conguala Ps 23). Il viadi müda la vita e la cretta. Ün o tschel viandant tschüffa illa Bibla ün nouv nom cur ch’el inscuntra a Dieu ed a sai svess, anzi l’es ün oter co avant il viadi (conguala p.ex. Gen 32,23–33); il viadi nun es forsa il böt, ma cuntegna ün böt in sai stess, passà ed ün avegnir tschüffan sen, vegnan reconciliats d’üna benedicziun inaspettada.
Chi va plan, va san e lontan (grazcha a l’inscunter tanter Dieu ed uman). – Uschea giavüscha a tuots bun viadi e blera benedicziun.