Punk u «Peace and Love»? - Ina prisa punk – en vista a las crisas da noss temp!?

Betg mo ina presa, mabain in orcan da punk dovria noss temp, di la reschissura grischuna Magdalena Nadolska. A questa conclusiun arriva ella en vista ad ina societad che fa pauc, malgrà la crisa dal clima, malgrà la democrazia che va en muschna en l'America ed en blers pajais da l'Europa, malgrà populissem, femicidis e guerras. Tut quai furma la basa per il toc «Monokali Polypunk» – Eine Prise Punk im Theater Chur ch'è da vesair actualmain en il teater da Cuira.

Daco «Punk» e betg «Peace & Love»

Betg «peace and love», mabain punk saja la medischina necessaria per svegliar ina societad durmentada, di Magdalena Nadolska ed includa era sasezza. Malgrà tut las crisas actualas capitia pauc u nagut. Perquai punk. L’essenza dal punk saja la gritta e la gritta saja la forza che mettia l'uman en acziun. Uschia è naschì il project che ha manà al toc da teater «Monokali Polypunk».

Punk 2025 – po schizunt avair in aspect conservativ (da conservar)

Il toc han scrit Flurina Badel e Gianna Olinda Cadonau. Era per ellas èsi cler: I na va betg per far reviver ina energia dals onns 70, mabain per chattar il punk dad oz. Ma co tuna e co vesa or il punk da l'onn 2025?

Il film dals Cuntrasts «Ina prisa punk» prenda si questa dumonda. El lascha vegnir a pled acturas ed acturs, la musicista, las auturas e la reschissura e mussa, tge furma che il punk dad oz pudess avair.