«Blers vegnan gnanc suenter perquai che tut sto ir svelt tar mai», di Selina Solèr en il profil. Uss possia ella regular quai meglier. Quest sa cuntegnair ha procurà per resistenza tar ils auters ed ella è sa retratga adina pli fitg, quai che n’haja betg fatg bain ad ella. Quai saja ì uschè lunsch che Selina Solèr na pudeva betg pli durmir e la finala betg pli lavurar. Il resultat è stà ina depressiun.
Igl è schon mintgatant grev cun mai.
Ina segunda giada è Selina Solèr dada en ina depressiun suenter in accident da skis. Ella aveva gist maridà e vuleva far cun ses um in viadi da nozzas pli lung. Ultra da quai aveva ella dà giu la plazza per cumenzar insatge nov. Cun l’accident da skis è dad in mument sin l’auter tut sa midà.
Selina Solèr di ch’ella è ina persuna che dovra plans. «Quai dat a mai orientaziun. Pitschnas midadas van schon, ma che tut è sa midà è stà fitg dir.»
Per sia lavur cun uffants e giuvenils en la Clinica psichiatrica da giuvenils a Cuira po ella profitar da sias experientschas. «Jau sai co ch'igl è da na betg pudair durmir la notg», di Selina Solèr. Ed ella sa er tge sforz ch’i dovra en questa situaziun per be far ina chaussa al di, per exempel far la duscha e che quai è gia insatge grond.
Las experientschas cun depressiuns han marcà mai fitg. Quai ha fatg mai tar quella persuna ch’jau sun.
Tgi che lavura en ina clinica psichiatrica, ina clinica acuta, sto esser resistent a stress. La situaziun po sa midar dad in mument sin l’auter. Ins na sa betg cura ch’insatgi nov vegn e cun tge problems. Sper quai han er pazientas e pazients ch’èn gia en la clinica basegns. Ed er sch’igl è uss gist tut en urden, po la situaziun cupitgar dad in mument sin l’auter.
Il pli impurtant per pudair lavurar en la Clinica psichiatrica da giuvenils a Cuira è d’avair plaschair vid la lavur.
En la Clinica psichiatrica a Cuira èn giuvenils tranter 12, 13 e 18 onns. L’incumbensa da Selina Solèr ch’è pedagoga d’uffants è da sustegnair els en lur mintgadi. Per exempel da clamar els la bun’ura e da mangiar cun els. Impurtant èn er ils discurs cun ils giuvenils. Sper tut la rutina han ils giuvenils en la clinica natiralmain er adina puspè crisas nua che nagut funcziunescha. Lura èsi impurtant da reagir endretg. «E mintgatant pudain nus er simplamain dar gieus cun els ed avair legher», di Selina Solèr.