Cun ses quart rang en il heptatlon ha ella procurà per battacor tar bleras Grischunas e Grischuns durant ils gieus olimpics a Paris 2024. Quest grond success è dentant bunamain stà ina consequenza logica en sia carriera sportiva.
Annik Kälin è ida pass per pass adina in zic pli lunsch e pli aut. Ella è s'etablida magari svelt en il ravugl da las meglras heptatletistas dal mund. Gist a ses emprims campiunadis mundials d'atletica leva cun l'elita – l'onn 2022 en ils Stadis Unids da l'America – vegn ella 6avla. Il medem onn gudogn'ella sensaziunalmain la medaglia da bronz als campiunadis europeics a Minca.
Pli aut, pli lunsch, pli svelt
100m obstachels, siglir en aut, stuschar la culla, 200m sprint, sigl en lung, bittar la lantscha e currer 800m: Quellas set disciplinas furman il heptatlon. Nagina autra disciplina en l'atletica leva pretenda uschè bler multifariadad sco il heptatlon.
Jau hai adina gì grond plaschair da la multifariadad.
E quai fascinescha Annik Kälin, ch'è creschida si en ina famiglia polisportiva a Grüsch. I dovra da tut insatge. Reunir spertadad, forza e tecnica, uschia circumscriva la giuvna sportista e fisioterapeuta il heptatlon.
Annik Kälin vegn dapi adina trenada da ses bab Marco, ch'è era medi – in duo che funcziuna, harmonescha e sa cumplettescha. «Jau na sun segir betg adina stada ina simpla», tradescha ella en il discurs cun ina tschegnada. Ella giaudia mintga mument ch’ella passenta ensemen cun ses bab e trenader.
Er en l'atletica leva procura il tema doping adina puspè per lingias grassas. «I fiss bel, sche noss sport fiss clean. Quai na correspunda dentant betg a la realitad», uschia Kälin. 24 uras 7 dis l'emna sto l'atleta inditgar a la Federaziun internaziunala d'atletica leva nua ch'ella sa chatta. Quai per esser pronta per eventualas controllas da doping spontanas.
En discurs cun la moderatura da RSO, Katharina Balzer, e cun il moderatur da RTR, Andri Franziscus, s’exprima Annik Kälin plinavant tranter auter era davart sia uffanza en ina famiglia sportiva, ses talent sco pasternera e sia vita quotidiana sco atleta.
Annik Kälin (* 27 d'avrigl 2000) è sa spezialisada sin il heptatlon ed ha era success en il sigl en lung. Actualmain è ella possessura dal record naziunal svizzer en il heptatlon ed en il sigl en lung ed è vegnida il 2025 a Nanjing vice-campiunessa mundiala en il sigl en lung.
10 dumondas curtas
- Currer 800 meters a la fin dal heptatlon: paina u plaschair? 50:50.
- Tge è pli decisiv tar la cumpetiziun: chau u corp? Chau.
- Quart rang als gieus olimpics a Paris: anc adina frust ubain gia daditg magunà? Gia daditg magunà.
- 7 meters en il sigl en lung: realisar quest onn u 2026? 2025.
- Il team d'atletica leva svizzer ha grond succes: datti in spirit da team u èsi la fin finala tuttina in mund da cumbattantas singulas? 50:50.
- Discussiuns areguard il tema doping: dat quai sin la gnerva u èsi necessari? Necessari.
- Cumbat per medaglias u cumbat per records? Cumbat per medaglias.
- Heptatlon per dunnas – decatlon per umens: ina differenza che fa senn u betg confurm al temp? Ina differenza che fa senn.
- Avant ina cumpetiziun: discurs da tactica cun il bab e trenader u ruaus? Discurs da tactica cun mes bab.
- Amicizia cun concurrentas directas: pussaivel u nunpussaivel? Pussaivel.
«50:50» – il videocast communabel da Somedia e RTR
Somedia e Radiotelevisiun Svizra Rumantscha RTR porschan cun il format da talk «50:50» in nov product communabel. Il videocast vul promover mintga mais discurs approfundads cun represchentantas e represchentants da l'economia, da la politica e da la societad.
Tut ils discurs
Pertge il num «50:50»?
- Equiliber e diversitad: il num dal videocast accentuescha las stentas da preschentar ina selecziun da giasts equilibrada e diversa per represchentar ina paletta vasta da chaus e persunalitads.
- Simplicitad e clerezza: In num simpel e chapibel sco «50:50» associescha directamain l'idea fundamentala dal podcast, senza stuair declerar bler dapli.
- Simbol da fairness: La relaziun da 50:50 vegn duvrada savens sco simbol per fairness ed egualitad – quai che correspunda bain er a las finamiras dal podcast.