Sara Schmied è la gronda speranza dal cader svizzer da skeleton. Cun per 20 onns ha ella l’emprema giada la schanza da sa qualifitger als gieus olimpics. En sia giuvna carriera da skeleton ha la Schlarignotta gudagnà bleras cursas naziunalas ed internaziunalas da junioras. La stagiun passada è Sara daventada campiunessa mundiala en la categoria U20.
La fermezza da Sara è il start. Là tutga ella tar las tschintg meglras skeletonistas dal mund. In grond avantatg tar las cursas. La cuppa mundiala prevesa set cursas da qualificaziun. Per ina qualificaziun sto Sara esser en la rangaziun duas giadas tranter las emprimas 20 en las cursas da la cuppa mundiala.
Sche ins è sin il stadal sa sent’ins senza pais. En quel mument sun jau simplamain jau e mes stadal. Nagut auter. Ins reusseschia d’emblidar tut. Perquai ma fa quest sport grond plaschair.
L’onn passà ha Sara absolvì la recruta da sport. Durant quel temp ha ella pudì sa deditgar cumplettamain al trenament. Tant pli gronda è la speranza sin bunas prestaziuns durant la stagiun da la cuppa mundiala.
-
Bild 1 von 2. Sara Schmied en ses element. Skeleton è in sport svelt. Cun enfin 130 kilometers per ura scursaleschan las skeletonistas cun il chau davantor giu per in chanal da glatsch. Bildquelle: aquarium studios.
-
Bild 2 von 2. Sara Schmied ed il trenader da la squadra naziunala Mareks Mezencevs inspecteschan il vial ad Innsbruck. Bildquelle: aquarium studios.
Durant las emprimas cumpetiziuns reusseschia Sara Schmied da metter da la vart il squitsch mental. Ma pli manaivel che ils gieus olimpics vegnan, pli fitg ch'il squitsch crescha.
En la davosa cursa ad Altenberg, Germania, è la qualificaziun l’entira emna in tema. Tuts discutan be anc da quants puncts che mancan. Il di da la davosa cursa va Sara cun ina gronda nervusadad a la cursa. La giuvna skeletonista Sara na reussescha betg a far frida cun quel squitsch.
Jau era l’entira emna sut squitsch. Lura è capità quel sbagl en la storta quatter. Immediatamain hai jau savì, uss èsi a fin, il siemi è crudà en l’aua.
La dischillusiun è gronda. In’entira stagiun, blers sacrifizis, nundumbraivlas uras da trenament. En ina mesa secunda è tut auter. Quai è l’emprim anc da magunar. Er sche Sara Schmied n’ha betg sa qualifitgà per ils gieus olimpics da Cortina resta ella motivada. Sia finamira: Ils gieus olimpics 2030.
La Schlarignotta Sara Schmied ha questa stagiun emprendì ina gronda lecziun e sa tge che ella sto er lavurar ils proxims onns: davart sia fermezza mentala.