Il punct da partenza da la ficziun raquintada en questa Marella è il suandant: Nus ans chattain en la Svizra dal 2040. La naziun vegn regida da l’intelligenza artifiziala Elvezia che controllescha patratgs, emoziuns e vita quotidiana da la populaziun.
Tuts e tuttas en Svizra vivan ina vita facila e monotona. La Svizra fa numnadamain part dals pajais che sa chattan dadens in grond mir. Suenter la Terza Guerra mundiala era la construcziun da quest mir vegnida considerada sco «egoissem indispensabel», per ch’almain ina part da la populaziun mundiala possia star bain. Uschia è la populaziun mundiala partida en duas categorias: quels e quellas che vivan dadens, e quels e quellas che (sur)vivan dador il mir.
L'emprima part da quest'istorgia raquinta da l’emprim contact tranter Artur (che viva en Svizra, pia dadens il mir) e Zefira (che viva dador il mir).
Suenter ina lunga correspundenza, prenda Artur ina decisiun vaira extrema:
Sch’ins guarda da la vart umanitara, lura è quai propi l’unic gist sche Zefira surpiglia mia plazza.
Zefira – uschia almain l'opiniun d'Artur – profitass dapli ch'el dal mintgadi dadens il mir. Uschia barattan els dus lur lieu da vita – insatge che vegn lubì dad Elvezia, che vul simplamain avair in numer constant da persunas en Svizra.
Co lur istorgia cuntinuescha, schebain Zefira chatta la ventira en il «paradis» dadens il mir, e nua che la speranza sa zuppa en il mund dal 2040 – quai datti d’udir en la segunda part da l'audioficziun or da la plima da Nadine Hosang.
Il mintgadi sco basa per il text
Igl è Ivo Bärtsch («Head of Drama» al Lyceum Alpinum Zuoz) ch'ha incumbensà sia anteriura scolara da scriver in text per la tribuna. Oriundamain avess ella vulì scriver in text positiv, ma Nadine Hosang è vegnida inspirada da quai ch’ella observa en il mund: mirs (era simbolics), ingiustias socialas ubain economicas, guerras etc.
Mes punct da partenza è ina situaziun distopica. Ma suenter avair vesì il toc, vuless jau cunzunt ch’il public resentia speranza.
Pervia da tut ils conflicts e malgistadad sin il mund saja New World a la fin daventà in text plitost distopic, dentant punctuescha l'autura da vulair effectuar la finala in sentiment da speranza cun avair vis ed udì il toc.
Impressiuns da New World al Festival Travers 2025:
-
Bild 1 von 6. Jouni (narratur) en il toc New World. Bildquelle: Mess a disposiziun da Mayk Wendt.
-
Bild 2 von 6. Valentina (preschentadra da novitads) en il toc New World. Bildquelle: Mess a disposiziun da Mayk Wendt.
-
Bild 3 von 6. Impressiun da la represchentaziun da New World a chaschun dal Festival Travers 2025. Bildquelle: Mess a disposiziun da Mayk Wendt.
-
Bild 4 von 6. Impressiun da la represchentaziun da New World a chaschun dal Festival Travers 2025. Bildquelle: Mess a disposiziun da Mayk Wendt.
-
Bild 5 von 6. La truppa da scolars e scolaras dal Lyceum Alpinum Zuoz ch'han preschentà la versiun rumantscha da New World. Bildquelle: Mess a disposiziun da Mayk Wendt.
-
Bild 6 von 6. Sin incumbensa dad Ivo Bärtsch (Lyceum Alpinum Zuoz) ha Nadine Hosang scrit il toc New World. Bildquelle: Mess a disposiziun da Nadine Hosang.
Il 2024 è NEW WORLD vegnì mussà a Zuoz en ina versiun tudestga. Per l’ultim Festival Travers (atun 2025) ha Andrea Urech translatà il text en puter e questa versiun furma la l'audioficziun ch'è d'udir en La Marella.