Siglir tar il cuntegn

Header

cuntegn

Ura culturala Chalenders rumantschs 2024

Els tutgan tar la midada da l’onn en nossas valladas: ils chalenders rumantschs. En l’ura culturala preschentain nus il «Calender romontsch», il «Calender per mintga gi», il «Chalender ladin» e la «Revista digl noss Sulom».

Calender per mintga gi

Il «Calender per mintga gi» va sur ils cunfins dals idioms ora e cuntegna contribuziuns en sursilvan ed en sutsilvan. Tipic per il chalender da las valladas renanas è ch’el dat ina vusch al pievel e ch’el cuntegna fotografias fascinantas da motivs or da la natira. Questa giada pon ins admirar differents insects sco mustgas, splerins, baus ed avieuls.

audio
Chalenders 2024: Calender per mintga gi – Chalender Ladin
ord Actualitad dals 06.01.2024. Maletg: RTR
laschar ir. Durada: 5 minutas 6 Secundas.

Chalender Ladin

Art e litteratura stattan en il center dal «Chalender Ladin» che preschenta sper lavurs dad artists professiunals er ovras dad uffants e giuvenils. Ina tradiziun dal chalender da l’Engiadina è era la cronica che lascha passar revue l’onn cun pleds e maletgs.

Il «Calender romontsch», il «Calender per mintga gi», il «Chalender ladin» e la «Revista digl noss Sulom».
Legenda: RTR

Calender romontsch

Il «Calender romontsch» stat quest onn sut il tema «Sin viadi». L’animal nair sin la cuverta che fa bunamain tema, sa mussa en il chalender sco chaun da pastur che ha accumpagnà il fotograf durant ina stad en la Val Segnas. Insatge persunal èn las fotografias dad absolvents ed absolventas da scolas en Surselva. Il «Calender romontsch» undrescha uschia ils giuvens e las giuvnas per lur success en la scolaziun.

audio
Chalenders 2024: Calender romontsch – Revista digl noss Sulom
ord Actualitad dals 06.01.2024. Maletg: RTR
laschar ir. Durada: 5 minutas 9 Secundas.

Revista digl noss Sulom

La «Revista digl noss Sulom» è deditgada al tema «tradiziuns». Far pan en ils «pastregls» u «pastroins», ils furns dal vitg a Lantsch e Salouf. En in quiz vai per tradiziuns da Nadal en tut il mund. Nua mettan ins cucumeras vi dal pignol da Nadal e nua zuppan ins scuas?

RTR ura culturala 11:00

Artitgels legids il pli savens