Il territori Andermatt-Sedrun-Mustér attribueschan il svilup negativ da la prevendita a la malsegirtad pertutgant corona e las mesiras. Quai saja stà il motiv per il svilup negativ, di il responsabel Silvio Schmid. Ins n'haja betg savì, co la situaziun vegnia a sa sviluppar e perquai betg cumprà in'abunament – ni spetgà da cumprar.
Il mument na ston ins betg avair in certificat da Covid per pudair ir cun skis ni cun aissa. Quai po dentant anc midar. Tut tenor decisiun dal Cussegl federal. Quest ristg da forsa betg pudair ir sin pista, n'ha però betg gì dapertut ina grond'influenza:
- Beat Zenklusen da las pendicularas Breil, Vuorz ed Andiast discurra d'in onn da record.
- Las pendicularas d'Arosa e Lai han vendì en la prevendita 10% dapli che l'onn passà.
- Era ils territoris Flem-Laax-Falera, Tavau Claustra e San Murezzan han vendì dapli cartas da l'onn.
- A Scuol ha la prevendita pir gist cumenzà avant in pèr dis. Uschia na pon els betg communitgar cifras. Tuttina tar las pendicularas a Savognin: Là cuzza la prevendita anc enfin la fin dal november.
Cumenzament gartegià a Laax
Era a Laax ha la stagiun d'enviern cumenzà la fin d’emna vargada cun success. Las pendicularas da Laax fan ina bilantscha positiva. Els han beneventà 2'300 giasts. Quai saja tant sco avant la pandemia, din ils responsabels sin dumonda da RTR.
Blers giasts d’auters chantuns
Ils autos plains cun skis, aissas, chapellinas e guants che han parcà en il grond parcadi da las pendicularas da Laax, avevan savens numers d’auters chantuns. Per exempel Turitg, Turgovia, Zug, Son Gagl u perfin da la Germania. Giuven enfin vegl ha chattà la via a Laax la fin d’emna vargada. Malgrà ch’igl è pir entschatta november e la naiv lieua puspè en ils vitgs, saja la motivaziun d’ir sin pista gronda, han blers ditg.
