Sco la regenza ha communitgà pussibiliteschian las schluccadas dal Cussegl federal dals 26 da zercladur da realisar la proxima sessiun en l'edifizi a Cuira. I dettia reglas differenziadas pertutgant il dumber da persunas e la distanza ed er l'obligatori da mascrinas stoppia vegnir resguardà. La conferenza da presidents dal Cussegl grond ha uss decidì da realisar la sessiun che cuzza dals 25 fin ils 28 d'avust en l'edifizi dal Cussegl grond. La sessiun è er averta per il public.
In onn e mez sessiuns «extra muros»
Pervi da la pandemia èn las sessiuns vegnidas fatgas las ultimas tschintg giadas u en la halla da la citad a Cuira u en il center da conferenzas a Tavau. L'avrigl dal 2020 cura che la pandemia aveva gist cumenzà, avevan ins decidì da stritgar la sessiun d'avrigl. La proxima sessiun, dal zercladur 2020 è lura vegnida realisada en la halla da la citad a Cuira. Quella ha custà radund in mez milliun francs. Dapi lura han las sessiuns dal december, dal favrer, da l'avrigl e dal zercladur gì lieu a Tavau en il center da conferenzas.