La nova lescha per la donaziun d'organs partiss da principi dal fatg, che tgi che n'è betg s'exprimì encunter ina donaziun d'organs vala sco donatur u donatura. Ils parents pon dentant refusar ina donaziun. Sch'i na dat nagins parents pon ils organs vegnir duvrads.
Per la nova lescha
Thomas Fehr è il schefmedi da la medischina interna da l'Ospital chantunal dal Grischun, e commember dal comité per la nova lescha. En l'Ospital chantunal vegnian mintg'onn in fin quatter organs prendids ora per ina transplantaziun. Transplantaziuns na fa l'ospital dentant naginas. Fatg vegn però il tractament posteriur da pazientas e pazients ch'han survegnì in nov organ.
Manar uss la discussiun
Las bleras persunas che vegnian en dumonda per ina donaziun d'organs sajan pazients u pazientas che hajan gì in culp dal tscharvè u in accident, e perquai in trauma da la chavazza e dal tscharvè. Per ils parents saja quai adina ina situaziun nunspetgada ed extrema. Lura avessan els era anc da decider davart ina donaziun d'organs en uschè in mument, Thomas Fehr è perquai da l'avis da far questa discussiun ad uras.
Igl è fitg impurtant che nus manain ussa questa discussiun, e betg en ina situaziun extrema sin la staziun intensiva.
Sche la persuna pertutgada na saja betg s'exprimida davart la donaziun d'organs, sa decidia pli che la mesadad dals parents encunter ina donaziun. La nova lescha dettia in'autra basa per il discurs, perquai ch'ins possia partir dal fatg che persunas che n'èn betg s'exprimidas encunter ina donaziun d'organs durant la vita sajan donaturs u donaturas. Quai saja sco in nov contract da la societad: ins sa decidia da principi per ina societad solidarica. Tgi che na veglia betg esser donatur u donatura d'organs stoppia s'exprimer encunter quai durant sia vita. La fin finala pon sco fin uss ils parents s'exprimer encunter ina donaziun. Sch'insatgi n'avess nagins parents per dumandar pon ils organs vegnir duvrads. In cas ch'ins n'haja chattà nagin parent u ina persuna da confidenza n'è betg enconuschent a Thomas Fehr.
Cunter la nova lescha
Rita Famos è presidenta da la Baselgia evangelica refurmada Svizra. Ella accentuescha che donaziuns d'organs sajan ina buna chaussa e ch'i dovria dapli organs. Era la finamira che dapli organs stettian a disposiziun, chatt'ella ina buna chaussa. Dentant s'exprima Rita Famos cleramain encunter la nova lescha da transplantaziun. Sch'i vegnia prendì or organs ad ina persuna, lura saja quai in'intervenziun en l'integritad corporala. Il stadi saja obligà da proteger l’integritad corporala che saja in dretg fundamental. Era sch'ils parents pon dir na ad ina donaziun d'organs, è ella cunter la nova lescha.
Decider davart ina donaziun d'organs sch'ins po be supponer tge che la persuna pertutgada avess vulì, na va betg.
Sch’insatgi haja gì in accident saja quai ina situaziun extrema per ils parents, quels na duessan betg era anc stuair prender questa decisiun. Quai chaschunia per l'ina squitsch e per l'autra na sajan ils confamigliars n'er betg adina perina.
Dapli scleriment activ
Era per la persuna che survegnia l'organ saja quai ina situaziun delicata, uschia Rita Famos. Quella persuna stoppia pudair esser segira ch'il donatur u la donatura haja dà l'organ ord libra veglia. Era exempels da pajais che hajan il model dal consentiment presumà per la donaziun d'organs, sco per exempel il Danemarc – mussian ch'i na dettia betg dapli donaziuns che cun il sistem svizzer actual. Tenor Rita Famos n'han ins betg fatg avunda sforzs per infurmar la populaziun, ch'ins duess s'exprimer per dar organs. En mintga cas stoppia il stadi procurar, che tut las persunas sajan infurmadas davart la lescha. Sco alternativa a la nova lescha propona ella, d'infurmar pli activamain la populaziun. Quai per exempel cura ch'insatgi fetschia in contract cun ina cassa da malsauns, ubain cura ch'ins survegnia la patenta d'ir cun auto.
Sin in clic tut davart las votaziuns dals 15 da matg.
