Siglir tar il cuntegn

Header

cuntegn

2. retschertga da votaziuns Svizra vul midar la pratica per donar organs

Bun 10 dis avant la dumengia da votaziuns schessan votantas e votants Gea a tut las trais fatschentas che vegnan a l'urna. Quai mussa la segunda retschertga che l'institut da perscrutaziun gfs.berna ha fatg sin incumbensa da l'entira SRG SSR.

audio
Retschertga gfs.berna – focus donaziuns d'organs
aus Actualitad vom 04.05.2022.
abspielen. Laufzeit 3 minutas 10 Sekunden.
Grafica cun la survista da tut las trais votaziuns federalas dals 15 da matg.
Legenda: Il trend mussa trais giadas Gea – il pli stretg vegni probabel per la lescha da films. RTR grafica

Mintgina e mintgin duai donar organs

Ils mainis èn para fatgs: Be 2% da las persunas dumandadas na sa anc betg co vuschar ils 15 da matg. Cunquai mussa la tendenza ad in Gea per la lescha da donaziuns d'organs. L'argument principal per ina midada da la pratica para era cler: 80% èn da l'avis ch'i dettia en Svizra memia paucas donaziuns d'organs e ch'i saja impurtant da schliar quest problem. Ils adversaris argumenteschan surtut ch'ina donaziun d'organs saja ina decisiun fitg persunala e ch'il stadi na duai betg sa maschadar en.

Facit: La midada da paradigma chaschuna bain insaquantas dumondas eticas – tuttina chatta el sustegn en la populaziun.

Grafica che mussa che 61% èn per ina midada tar la donaziun d'organs
Legenda: Il sustegn è sa sminuì dapi mez mars, cura che gfs.berna ha fatg l'emprima retschertga. RTR grafica

Malgrà lingias grassas: Gea a Frontex

Adina dapli persunas paran da dir Gea a la participaziun svizra a la Frontex: La nova retschertga da l'institut gfs.berna mussa in'acceptanza da 69%. Surtut persunas ch'èn datiers da la PPS eran l'emprim anc scepticas – entant sustegnan ellas il fatg che la Svizra sto sa participar cun dapli daners a la Frontex, l’organisaziun che controllescha e segirescha ils cunfins e las costas da l’Uniun Europeica en connex cun la cunvegna da Schengen.

La critica da la sanestra – che la Frontex saja responsabla per bleras violaziuns dals dretgs umans da fugitivs – perda sustegn. Persuenter èn adina dapli persunas da l'avis che la Frontex dovra dapli ressursas per sias incumbensas, e che quellas protegian era la Svizra da criminalitad e migraziun illegala.

Grafica che mussa il sustegn da 69% per la participaziun svizra a Frontex
Legenda: Malgrà che la Frontex scriva lingias grassas e fa roschadas en la direcziun: La Svizra vul cuntinuar cun la collavuraziun. RTR grafica

Piz a cup per la Lex Netflix

Il pli stretg resultat ils 15 da matg pudess quai dar tar la lescha da films, era enconuschenta sco Lex Netflix: Anc 56% vulan prescriver a servetschs da streaming da l'exteriur da stuair investir ina part da lur entradas generadas en Svizra, en la branscha da films indigena.

Ina raschun che lascha balluccar il sustegn: La Partida liberaldemocratica ha bain anc votà Gea en la debatta dal Cussegl naziunal, uss dentant ha ella decis la parola Na en vista a la votaziun. Perquai suondan adina dapli persunas che stattan datiers a la PLD questa tenuta.

Grafica che mussa ch'ils sutegn per la lescha da films è sa minuì sin 56%
Legenda: RTR grafica

Detagls da la retschertga

Avrir la box Serrar la box

La segunda unda da la retschertga ha l'institut da perscrutaziun gfs.berna fatg tranter ils 20 e 27 d'avrigl 2022. Sa participadas èn 6'315 persunas cun dretg da vuschar. La quota da sbagls munta a +/- 2.8 puncts procentuals.

Il suveran decida ils 15 da matg davart tuttas trais fatschentas.

Dossier online

Avrir la box Serrar la box
Dossier online
Legenda: Grafica RTR

Sin in clic tut davart las votaziuns dals 15 da matg.

RTR novitads 06:00

Artitgels legids il pli savens

Scrollar a sanestra Scrollar a dretga