Il matg 2022 elegia il suveran grischun il Cussegl grond. La repartiziun dals 120 sezs sin ils circuls succeda tenor il dumber da la populaziun svizra en mintga circul. La Chanzlia chantunala ha publitgà oz la repartiziun per la proxima perioda d’uffizi. Sulet en quatter circuls datti midadas.
A Cuira ed a Maiavilla è la populaziun creschida ed ils circuls survegnan in sez dapli. En tut survegn:
- Cuira 21 sezs
- Maiavilla 5 sezs
La curta tiran ils circuls Tschintg Vitgs e Mesauc che perdan in sez. En tut survegn:
- Tschintg Vitgs 11 sezs
- Mesauc 1 sez
Il Mesauc perda ses segund sez malgrà che la populaziun è restada tuttina gronda. Avant quatter onns aveva il circul profità d’in mandat restant. Questa giada n’haja quai betg pli tanschì per in tal mandat, uschia la Chanzlia chantunala.
En ils auters circuls resta la repartiziun la medema sco en la legislatura actuala.
