Duas emnas Dolce far niente en l'Italia – tgi na siemia betg da quai. Mintgatant van siemis en vigur, ma forsa betg uschia sco quai ch'ins pensa. Trais redacturas e redacturs dad RTR èn duas emnas da viadi en l'Italia, betg per far niente, ma per far molto. Els èn a la tschertga dad istorgias, musica e recepts e portan duas emnas italianità en las stivas rumantschas.
Istorgias, musica e recepts
Tgi èn las Talianas e Talians e tge definescha els? Nossa redactura Fabia Caduff è da viadi per inscuntrar las indigenas ed indigens e per mussar lur moda da viver. Noss redactur Marcus Petendi è sin viadi per crear musica. Sia finamira è da translatar e crear trais chanzuns rumantschas per talian cun agid da musicistas e musicists talians. E Stefan Dobler è a la tschertga da recepts locals. Tut quels recepts vegnan lura er publitgads sin nossa pagina web, uschia che vus a chasa pudais era cuschinar suenter quels.
Fermadas fixas datti a Genua, Bologna, Roma e Napoli. Lur viadi e las aventuras pudais tranter auter persequitar qua en l'artitgel – sper las reportaschas e videos pli lungs – er cun cun in tracker live ed impressiuns spontanas.
Cartas postalas
Ils dus redacturs e la redactura tramettan er salids postals. Tgi ch'avess gugent ina carta postala dad in dad els, po s'annunziar apaina ch'els sa mettan en viadi. E cun in zic cletg – cun la posta taliana na san ins mai ;-) – arriva lura ina carta directamain en vossa chascha da brevs.
Hits talians
10 dis italianità na va sa chapescha betg senza musica taliana. Durant l'entir temp da viadi tras l'Italia resuna quella era pli savens en il program da radio. Tranter auter preschentan moderaturas e moderaturs lur chanzuns preferidas talianas e vus avais lura er la pussaivladad da votar per ubain plazzar voss hit talian preferì. Guardar tgi che fa la cursa.
En quest senn: Buon viaggio al team da RTR e bun divertiment a vus.