- L'organisaziun mundiala da l'aura WMO avertescha d'ina perioda dad El Niño moderada fin ferma.
- Per ils mais zercladur fin avust vegnan prognostitgadas temperaturas sur la media en la gronda part dal mund.
- Ils extrems da l'aura pudessan cuntinuar cun gronda probabilitad fin il november.
Ditg ha bler inditgà quai, uss vali sco segir: Il fenomen da l'aura El Niño sa sviluppa danovamain en il Pacific tropic. Tenor l'Organisaziun mundiala per meteorologia da l'ONU è la probabilitad per in cumenzament tranter il zercladur e l'avust tar 80%. E la probabilitad ch'il fenomen cuntinueschia fin almain il november saja tar 90%.
Cun quai crescha il privel da sitgiras, inundaziuns ed undas da chalira en bleras parts dal mund. La secretaria generala da la WMO Celeste Saulo ha ditg: «Nus ans stuain preparar sin in eventual ferm eveniment dad El Niño che vegn ad accentuar sitgiras e plievgia ferma ed augmentar il ristg d'undas da chalira tant a terra sco er en l'ocean.»
Er il secretari general da l'ONU António Guterres è s'annunzià per video: «Cundiziuns dad El Niño derschan ieli en il fieu dal stgaudament global.» Las consequenzas sa derasasian anc pli vehement e pli lunsch. Era la temperatura media globala pudess crescher vinavant.
In fenomen da l'aura che sa repeta
El Niño è in fenomen dal clima natiral en il Pacific tropic. El sa repeta dus fin set onns e cupitga il clima en tschertas regiuns per uschè da dir da ses stadi normal en il cuntrari climatic extrem.
Uschia chatschan il vent da l'Ost en il Pacific tropic normalmain aua da surfatscha chauda da l'America dal Sid vers l'Indonesia e l'Australia. Sur la mar chauda s'auza aria umida, sin quai sa furman nivels ed i plova ferm. Davant il Peru e l'Ecuador vegn a medem temp a la surfatscha aua faida or da la profunditad. La mar resta frestga, l'aria sitga.
Da l'autra vart dal Pacific manca percunter la plievgia. L'Indonesia, l'Australia e parts da l'Asia dal Sidost sientan ora. Per part uschè ferm che terrens sa endireschan, racoltas sientan e guauds prendan fieu. Spezialmain ferm sentian uschia ils pajais sin l'emisfera dal sid las consequenzas. L'Europa resta per il pli a l'ur da quests spustaments.
Ultim El Niño è stà in dals pli ferms
L'ultim El Niño dal 2023/24 tutgava tenor la WMO tranter ils tschintg pli ferms dapi l'entschatta da las mesiraziuns l'onn 1950. El ha contribuì ch'il 2024 è daventà sin l'entir mund il pli chaud onn dapi l'entschatta da l'industrialisaziun. Spezialmain fermas fasas dad El Niño chaschunan donns da milliardas.