La midada dal clima porta dapli aura extrema cun consequenzas sco dapli crudadas da crappa e bovas. L’Institut per la perscrutaziun da la naiv e da lavinas SLF admonescha ils viandants d’esser precauts.
En spezial en il territori autalpin vegni pli privlus – e bovas ed auters eveniments na sajan strusch da preannunziar, di l’Institut SLF a Tavau suenter avair analisà divers studis. Viandants possian dentant minimar il ristg, cun s’infurmar bain e planisar lur ruta cun attenziun.
Dapli lavur, dapli viandants
Betg d’evitar è tenor il SLF dentant, che las sendas vegnan donnegiadas pli savens e ch’il mantegniment vegn a dar dapli lavur. La situaziun dal privel è era in impurtant tema, perquai ch’il plaschair da viandar vegn a crescher cun las temperaturas pli autras tras la midada dal clima, scrivan ils scienziads da l’institut a Tavau.
