Malgrà il bun resultat da la ÖVP da Sebastian Kurz tar las elecziuns europeicas vegni stretg per il chancelier austriac. Ina dumonda da disfidanza era gia annunziada. Uss vul la SPÖ dentant laschar cupitgar l'entira regenza cun ina proposta da disfidanza.
Il presidi da la SPÖ haja la dumengia saira surdà ina directiva correspundenta a la fracziun da la partida, ha communitgà la schefa da la partida Pamela Rendi-Wagner. La moziun da disfidanza vegn tractada il glindesdi suentermezdi tar ina seduta extraordinaria dal Cussegl naziunal austriac.
La partida populistica da la dretga austriaca FPÖ vul sustegnair il votum da disfidanza cunter Kurz. Ins vegnia a sustegnair unanim la moziun da la Partida socialdemocratica SPÖ, ha ditg in delegà da la FPÖ a las medias. Sche la proposta da disfidanza gartegia, sto il president austriac, Alexander Van der Bellen, nominar in nov chancelier.
RR novitads 06:00
