La regiun taliana Liguria n’è betg d'accord che la Svizra ha mess ella sin la glista da regiuns e pajais da ristg per il coronavirus. Las autoritads da la Liguria èn da l’avis che la Svizra n’haja betg valità endretg la situaziun e stoppia revocar sia decisiun. Las autoritads han intervegnì tar il consul general en l’Italia, sco l'agentura taliana ANSA rapporta.
Ils 70 cas sin 100'000 abitants sajan da manar enavos sin ina derasaziun locala, numnadamain en la citad La Spezia. Tenor las autoritads localas saja il dumber d'infecziuns novas puspè vid sa sbassar.
BAG resta tar sia decisiun
L'Uffizi federal per sanadad resta dentant tar sia decisiun che la regiun taliana Liguria resta sin la glista da pajais da ristg. Il BAG examineschia la situaziun dals pajais vischins sin basa regiunala. Pervi da quai crodia Liguria cun ina media dad 80 cas sin 100'000 persunas sur duas emnas sin la glista cun dapli ristg. Ina differenziaziun pli exacta tenor las regiuns na saja betg pussaivla, uschia il BAG envers l'agentura a novitads SDA.
Il BAG examineschia dentant adina vinavant la situaziun e vegnia ad adattar la glista tar midadas da al situaziun.