- A Bagdad han millis prendì part ad in cortegi da bara per il general mazzà iranais Qassem Soleimani.
- Sin fundament da la situaziun precara ha la Nato franà la scolaziun da las truppas en l'Irac.
- Il minister da l'exteriur da l'Engalterra Dominic Raab scusseglia da viadis en l'Iran ed en l'Irac.
Millis Iracais en la chapitala da Bagdad èn sa participads ad in cortegi da malencurada. Els hajan clamà «Mort per l’America», ha rapportà in fotograf da l’agentura da novitads AFP. Soleimani è vegnì mazzà la notg sin venderdi tras in’attatga da dronas americana datiers da l’eroport da Bagdad. Pervi da la situaziun tendida en l’Orient Proxim vulan ils Stadis Unids staziunar var 3’500 ulteriurs schuldads a Kuwait. Quai saja ina mesira da precauziun, hai gì num or dal Pentagon.
Critica envers ils Stadis Unids
Entras il mazzament dal general iranais Soleimani hajan ils Stadis Unids cuntrafatg al dretg internaziunal. Quai ha ditg il minister da l’exteriur russ Sergej Lawrow. Er la China ha crititgà l’USA. Washington stoppia terminar sia violenza nungiustifitgada hai num da China. L’agir da l’USA cuntrafetschia a las normas da las relaziuns internaziunalas. Entant ha l’Iran scrit en ina brev a l’ONU ch’ins resalva il dretg da defensiun. Tar il mazzament da Soleimani sa tractia dad in exempel per terrorissem statal.
RTR novitads 18:00
