Radund dus mais suenter l'arrestaziun brutala da l'afroamerican George Floyd (46) a Minneapolis porta la famiglia Floyd plant. Ella accusa la citad da Minneapolis e quatter policists pervi da mazzament e la violaziun dals dretgs burgais.
Plinavant vegn la citad inculpada da sa mussar «sapientivamain indifferenta». Uschia haja ella laschà nascher en las retschas da la polizia ina cultura da violenza excessiva, rassissem e nunchastiabladad per ils policists.
Floyd era mort ils 25 da matg, cura che la polizia aveva arrestà el a moda brutala. Ils policists supponavan, che Floyd haja pajà cun ina nota da 20 dollar falsifitgada. Ils policists èn vegnids relaschads ed atgisads. Ad els spetgan blers onns en praschun.
La mort da George Floyd ha distatgà sin l'entir mund protests da massa cunter violenza da la polizia e rassissem – il moviment internaziunal «black lives matter».
