Cunquai stat l'ultim element dal contract davart la sortida da la Gronda Britannia ord da l'Uniun Europeica UE – il uschenumnà Brexit. Quel è terminà sin ils 29 da mars 2019.
Il contract sco tal duai vegnir approvà definitivamain a la proxima dumengia tar l'inscunter suprem da l'UE a Brüssel. Fin là vegn il document examinà dals represchentants dals ulteriurs 27 stadis che fan part a l'UE.
En ses tweet scriva il president dal cussegl da l'UE Donald Tusk ch'il pachet sco tal saja «da princip» er sancziunà sin livel politic.
La prim-ministra britannica Theresa May aveva contractà ier mesemna saira anc quasi duas uras cun il president da la cumissiun da l'UE Jean-Claude Juncker a Brüssel. Ella veglia dentant turnar la sonda anc ina giada per sclerir entgins puncts, scriva l'agentura da novitads SDA.
May: «Quai è il dretg deal per la Gronda Britannia»
En ina curta decleraziun uffiziala aveva la prim-ministra gia defendì la gievgia a bun'ura a Londra la declaraziun publicamain. Theresa May ha annunzià da vulair prender posiziun il suentermezdi avant il parlament a Londra davart la decleraziun.
RR novitads 14:00