Quest augment possia star en connex cun variantas dal virus pli contagiusas, scriva la WHO. Ulteriuras raschuns pudessan dentant er esser schluccadas da mesiras en tscherts pajais e la stancladad da corona aifer la populaziun.
Il pli fitg creschian ils dumbers da cas tenor rapport en il Proxim Orient ed en l'Orient Central (14%). Plinavant er en l'Asia dal Sidost (9%), dentant er en l'Europa (9%) e l'America (6%).
En Svizra stagnescha il dumber da novas infecziuns. La situaziun saja actualmain fitg fragila, ha communitgà ier l'Uffizi federal da sanadad BAG.
Intginas partidas svizras vulan sfurzar averturas
En Svizra vul ina part da las partidas sfurzar il Cussegl federal d'avrir las ustarias ed implants da cultura a partir dals 22 da mars. Quai cun fixar questa data en la lescha da Covid-19. Il Cussegl naziunal debattescha mesemna avantmezdi en chaussa. Il Cussegl dals chantuns lura gievgia.
Vegnida è questa moziun da la PPS, sustegnida vegn ella er da represchentants da la PLD. Per ina maioritad en il parlament duvrassi dentant er vuschs dal center. Lezza fracziun vul bain er schluccar pli fitg las mesira, Ina data per questas schluccadas, na vul ella dentant betg fixar. Quai ha ditg la presidenta da fracziun, Andrea Gmür. La cumpetenza d’agir duai er en il futur restar tar il Cussegl federal.
