Neisa Bass e ses um han cletg – els san lavurar e survegnan paja. Els lavuran per il mument omadus en il homeoffice. Damai ch'en l’America è bler anc sco avant bun in’emna en Svizra. Stizuns, scolas, kinos e las rivas èn serradas.
L’atmosfera cumenza a vegnir stentusa – tuts lessan ir ordadora.
La dunna da 54 onns raquinta che parcs èn dapi circa duas emnas averts. Ils abitants hajan da star en colonna per pudiar ir en ils parcs, uschè grond è il desideri dad ir ordadora. I dettia era blers dapli che giajan cun il velo – «quai na vesan ins uschiglio betg».
Agid social
Ils Americans hajan la pussaivladad da dumandar per daners da dischoccupads, ma uschiglio saja l’agid social tut auters che quel en Svizra, declera Neisa Bass ch’è oriundamain da Zernez.
Tge che vegnia uss purschì, saja da mangiar gratuit ch’ins possia ir per tut en differents lieus. Per exempel ina stgatla cun nutritivas da basa che duain tanscher per in’emna per duas fin quatter persunas. Blers stettian en colonna pliras uras per survegnir quest da mangiar gratuit, declera Neisa Bass.
Tar blera glieud vai plaunet vi dal viv – perquai ch'ils Americans n’èn betg buns en spargnar.
Co vinavant?
Ils da Miami han survegnì ina perspectiva co vinavant suenter il lockdown. Davent dals 20 da matg duain stizuns e coiffeurs puspè avrir, ha Neisa Bass laschà savair. Ils 27 da matg duain lura era las ustarias puspè pudair avrir cun sumegliantas restricziuns sco tar nus. Purtar mascras è en ils blers lieus dentant vinavant obligatoric sco fin uss.
