L'Organisaziun mundiala da la sanadad WHO avertescha da documents che duain confermar che insatgi ha anticorpuls da corona en il sang.
Intgins stadis avevan proponì che persunas ch'hajan gì il virus, duain survegnir tals documents. Uschia duain talas persunas puspè pudair turnar pli baud a la lavur.
La WHO sustegna bain da testar quants pertschients da la populaziun ch'ha anticorpuls en il sang. Dentant na dettia il mument anc nagins indizis, che persunas che sajan sa revegnidas da Covid-19, sajan silsuenter vairamain immunas.
