Ils advocats dad Elon Musk han plinavant confermà ch’el haja repetì sia emprima offerta: Musk saja pront da pajar 54,20 dollars per aczia, pia radund 44 milliardas dollars per il servetsch da novitads curtas Twitter. Quella annunzia surprendenta vegn mo paucs dis avant ch’ina dretgira fiss sa fatschentada cun il cas. Twitter e Musk han numnadamain fatg plant in cunter l’auter.
Dispita pervi da fake-accounts
Il fanadur aveva Musk declerà che sia offerta da cumpra da l’avrigl na valia betg pli. Tenor il milliardari n'haja Twitter betg fatg indicaziuns correctas davart il dumber effectiv da fake-accounts sin la plattafurma sociala – uschia l’argumentaziun. Twitter percunter ha insistì ch’il contract saja valaivel e che Musk stoppia tegnair en quel. En consequenza eri da quintar cun ina lunga dispita giuridica. Tenor experts fissi probabel stà grev da sa retrair or da l’affera senza in grond donn finanzial.
