Siglir tar il cuntegn

Header

cuntegn

Elecziuns d'Europa 2019 Blers pajais annunzian auta participaziun a l'elecziun

Las elecziuns dal parlament d'Europa paran questa giada da carmalar dapli persunas a l'urna che avant tschintg onns. Stgars 430 milliuns burgais e burgaisas da l'Uniun europeica han dad eleger ils 751 deputads dal parlament d'Europa. Emprimas prognosas datti a las 20:00.

En la Slovachia per exempel sajan tenor stimaziuns tantas persunas sco anc mai vegnidas mobilisadas per in'elecziun dal parlament d'Europa. Ed en Pologna hajan durant las emprimas uras che las urnas eran avertas pli che dubel uschè bleras persunas dà giu las vuschs sco il 2014.

21 pajais elegian questa dumengia

En l'Uniun europeica elegian questa dumengia ils ultims 21 da 28 stadis lur novs represchentants en il parlament d'Europa. Stgars 430 milliuns burgais e burgaisas dals pajais da l'uniun èn dapi la gievgia appellads dad eleger ils 751 deputads per il parlament a Brüssel.

Tenor retschertgas vegnan probabel cunzunt las partidas criticas envers l'Europa a gudagnar vuschs. Er in plus da las vuschs pon probablamain ils Verds ed ils Liberals spetgar. Perder pudessan dentant ils Cristian-democrats sco er ils Social-democrats. Quai mintgamai cumpareglià cun las ultimas elecziuns dal 2014.

Successiun da Jean-Claude Juncker

L'elecziun dal parlament d'Europa è er decisiva per la successiun dal president da la cumissiun da l'UE, Jean-Claude Juncker. Per quest uffizi candidescha il schef da fracziun da la EVP, Manfred Weber. Concurrent dal Tudestg è il Socialdemocrat dals Pajais Bass, Frans Timmermans.

Ultimas urnas serra a las 23:00

Emprimas prognosas sin basa dad enquistas suenter l'elecziun, vegnan publitgadas questa saira suenter las 20:15. Las ultimas urnas serran lura a las 23:00 en l'Italia. E las 23:15 vegnan publitgadas las emprimas calculaziuns approximativas.

RR novitads 12:00

Artitgels legids il pli savens