En l'emprim scrutini da l’elecziun presidenziala n'ha nagin dals candidats e candidatas cuntanschì la maioritad absoluta. Suenter che tut las vuschs èn dumbradas vegn il president actual Emmanuel Macron cun sia «Republique en marche» sin 27,84% da las vuschs. Sin il segund plaz suonda Marine Le Pen dal «Rassemblement National» cun 23,15%.
Dals ulteriurs candidats n'ha nagin cuntanschì tantas vuschs. Igl è gia la segunda giada en seria suenter il 2017 ch’i dat l’elecziun decisiva tranter Macron e Le Pen. En ses pled suenter ch’el ha dumagnà en l’elecziun decisiva ha Macron admonì ch’i na saja anc gudagnà nagut. En direcziun da sia cuntracandidata Le Pen da la dretga ha el propagà ina Frantscha independenta e ferma, che saja francada en in’Europa ferma – e betg ina Frantscha xenofoba che na fetschia betg pli part da la tribuna internaziunala. Le Pen da l’autra vart ha declerà ch’ella veglia esser ina presidenta per tuttas Franzosas e tuts Franzos.
Posiziun da la Frantscha en l'UE en privel
L’avantatg dad Emmanuel Macron tar l’elecziun presidenziala procuria per levgiament en l’Uniun europeica. Quai ha ditg il correspundent da SRF en Frantscha, Charles Liebherr. La relaziun dal president franzos cun ses collegas d’uffizi en l’UE na saja betg adina simpel, dentant s’engaschia Macron per ils interess da l’UE. Quitads fetschia dentant che l’extrema dretga en Frantscha saja uss uschè ferma sco anc mai. Sco presidenta faschessia Marine Le Pen da l’emprim sortir da la zona da l’euro e la finala er da l’UE. Quai periclitass l’existenza da la cuminanza europeica, uschia la valitaziun da l’expert.
