Viktor Orban è dapi 16 onns a la pussanza da l'Ungaria sco primminister. Sia partida vala sco populistica da la dretga. Ses concurrent en las elecziuns dal 2026 è Peter Magyar ch'è sez stà part dal «sistem Orban» – el ha numnadamain gì in aut post en l'administraziun. Er el vala sco conservativ ed ha sumegliantas opiniuns sco il primminister actual.
Tumaisch Desax ha avant bunamain sis onns fatg midada da Mustér en il vest da l'Ungaria. Era sch'el na po betg eleger persequitescha el las elecziuns. E tenor el datti in punct decisiv che differenziescha ils dus candidats.
Jau hai udì che Magyar fiss il Orban, ma senza corrupziun. Da l'autra vart avess el dentant magari il medem sistem per il pajais.
Da quai ch'el ha udì da ses amis e da ses conturn èn las persunas pli veglias per Viktor Orban. Las persunas entamez che lavuran sajan quels che pateschan il pli fitg sut Orban. E quels che han raps detg avunda vegnan era atras e per quels guarda il primminister actual era.
La glieud giuvna sajan cunter Viktor Orban. Perquai ch'el ha serrà diversas universitads ed è da l'opiniun che la glieud sto ir a lavurar.
Tumaisch Desax na po betg ir ad eleger en Ungaria. El na elegess dentant betg Orban. Quai maina per part tar discussiuns. Ma alura di Tumaisch Desax ch'els pon era chalar da discurrer da la politica e baiver ensemen ina biera – quai saja alura era bun.