La Svizra ha beneventà l’onn nov cun suns dals zains, sect e tscha e là cun in fieu artifizial: A Turitg èn per exempel 100'000 da persunas stadas al lai per persequitar il fieu artifizial tradiziunal, l'uschenumnà «Silvesterzauber».
Radund 10'000 rachetas hajan illuminà il firmament per radund in quart d'ura. Tenor indicaziuns da la polizia èn las festivitads stadas paschaivlas e senza incaps pli gronds. Tuttina ha ella stuì entrar 120 giadas en acziun durant la notg.
Fieus artifizials hai dà a Genevra, a Brunnen SZ, Rheinfelden AG ed a Schwarzsee FR. A Lucerna è in planisà per la notg dals 01.01.2024. A Basilea e Berna na datti nagin fieu artifizial.
Incaps a Cuira
Dus manischunz ston quintar cun ina denunzia pervia da charrar cun alcohol. In da quels ha stuì dar gì ses bigliet al lieu. Ed igl ha dà in accident cun ina persuna blessada.
Plinavant ha la Polizia da la citad piglià in Chow Chow, che para d'esser scappà. Ed duas persunas èn vegnidas blessadas da fieu artifizial. La polizia da la citad ha er stuì entrar en acziun pervia da reclamaziuns pervia da canera. Ella ha tramess ina communicaziun en chaussa a las medias.
Calma notg a Berlin
En la chapitala tudestga s'inscuntran mintgamai bleras persunas per festivar Silvester. L'onn passà èn forzas d'agid e da la polizia vegnidas sajettadas gì cun pirotecnica. Quai onn n'èn betg bleras forzas d'agid vegnidas blessadas, auter che l'onn passà. Avant Silvester aveva il president communal smanatschà cun ina «notg da repressiun».
Singuls acts da violenza cunter forzas da segirezza hai dà. 15 policistas e policists sajan vegnids blessads pervia da pirotecnica. La polizia ha arrestà 300 persunas temporarmain. Ella è stada preschenta cun 4'000 policistas e policists.
Accidents cun pirotecnica hai per exempel dà a Koblenz. In um è mort pervia d'ina racheta. In'ulteriur um da 40 onns ha perdì ses maun pervia da pirotecnica a Berlin. La racheta saja explodida, curt suenter ch'ella è vegnida envidada.
Auter ch’a Berlin è la notg da Silvester a Cologna stada ruassaivla e senza incaps pli gronds. Quai ha communitgà la polizia envers l’agentura da novitads DPA. Radund 1'000 policists e policistas sajan stadas en acziun. Il dispositiv da segirezza saja stà fitg grond, suenter che plans per in’attatga sin il dom da Cologna eran vegnids enconuschents.
