Il glindesdi - tenor protocol il 10avel di suenter sia mort - è la Queen Elizabeth II vegnida sepulida. Quest di è ussa in firà naziunal. E qua la resumaziun da la ceremonia da commemoraziun:
Il funeral statal
Las 11:44 è il vaschè vegnì transportà en ina curta processiun davent da la Westminster Hall sur via vi en la Westminster Abbey. Dal reminent ha la Queen Elizabeth II maridà là il prinzi Philip avant 75 onns ed è vegnida encurunada là il 1953 sco regina.
A las 12:00 ha cumenzà il servetsch divin da bara. Suenter hai dà a las 12:55 duas minutas da silenzi per la Queen. Lura è l'imni naziunal vegnì intunà e circa a las 13:15 ha cumenzà la processiun tar il Wellington Arch che ha cuzzà circa 45 minutas. Là è il vaschè vegnì transportà cun in auto da bara enfin la chaplutta da St. George tar il chastè Windsor. A las 17:00 ha il servetsch divin da benedicziun cumenzà. A las 20:30 vegn la Queen lura sepulida, quai en il circul privat. La regina vegn sepulida sper ses bab King George VI. Il vaschè da ses um, prinzi Philip ch'è mort l'avrigl, vegn dischloccà sper quel da la regina.
Tgi era da la partida?
Sper la famiglia roiala èn 2'000 giasts da l'entir mund stads envidads. Numerusas scheffas e schefs da stadis e scheffas e schefs da la regenza èn stads preschents. Per la Svizra è il cusseglier federal Ignazio Cassis ì a Londra. Era commembras e commembers da las chasas roialas da l'Europa stadas envidadas. Dà tiers a l'invit han tranter auter las reginas e retgs da la Belgia, Spagna, Ollandia, Svezia, Norvegia, Danemarc e dal Giapun.
I n'ha però betg mo dà visitias roialas. Er blera glieud da lunsch e da manaivel ha persequità la ceremonia da sepultura.
Quai che munta tranter auter ina sfida logistica per il traffic public.
Guardar il funeral
Il funeral da la Queen pudais Vus guardar dapi las 10:00 en l'emissiun speziala dals collegas da «Gesichter & Geschichten» sin SRF 1 u en il livestream sissum l'artitgel.
