Il suspect cursescha gia pli ditg, uss è el s'endirì: Interpresas da commerzi cun materia prima duain avair guntgì las sancziuns svizras da la Russia cun agid da societads affiliadas, per exempel en ils Emirats Arabs Unids u auters stadis dal Golf. Il connex: La Svizra ha restrenschì il commerzi cun materia prima russa. Sco en l'UE valan per ieli russ ed auters products da petroli per exempel cunfins da pretschs pli auts. Uschia duai la Russia avair damain daners per sia economia da guerra.
Pervi da questas sancziuns han firmas da commerzi cun materia prima transferì fatschentas – davent da la Svizra vi tar firmas affiliadas, cunzunt en ils stadis dal Golf. Quests pajais n'han numnadamain betg decretà sancziuns cumparegliablas cunter la Russia. Da guntgir las sancziuns po esser illegal: Sch'i cula per exempel daners tranter la societad principala en Svizra e la societad affiliada en l'exteriur. Ubain, sch'i dat da la Svizra instrucziuns da fatschenta a la firma affiliada.
Il Seco valitescha las cuntravenziuns sco spezialmain grevas
Il secretariat da stadi per l'economia Seco ha dapi in temp en il visier almain trais firmas da commerzi cun materia prima, quai pervi da pussaivlas cuntravenziuns cunter las sancziuns. Uss è il suspect s’endirì tar duas interpresas: Il Seco exprima las cuntravenziuns sco spezialmain grevas ed ha perquai surdà ses resultats d'investigaziun a la Procura publica federala per l'ulteriura persecuziun penala. Funtaunas fidablas conferman questa retschertga dad SRF.
Chasti fin ad 1 milliun francs
Ils dus cas da materia prima pudessan daventar ina premiera: Anc mai dapi che las sancziuns da la Russia èn entradas en vigur ha la Procura publica federala surpiglià investigaziuns dal Seco pervi da cuntravenziuns. Pussaivel è quai tenor la lescha d’embargo mo en cas spezialmain grevs. Cuntravenziuns levas chastiescha il Seco sez.
La Procura publica federala ed il Seco na s'expriman anc betg davart ils dus cas. La procura publica federala scriva sin dumonda sulettamain ch'i dettia il mument differents scleriments. Sco emprim pass ha ella da decider sch'ella instradescha ina procedura formala.
Radio SRF enconuscha il num d'ina da las duas firmas da materia prima ch'èn en il visier da la persecuziun penala. L'interpresa lascha drizzar ora sur in advocat: I na saja enfin ussa betg vegnì contactà da la Procura publica federala. A las interpresas smanatscha ina multa dad 1 milliun francs sco chasti maximal. I vala la presumziun d'innocenza.