Il medem mument han experts dal patrimoni cultural dentant avertì en ina brev averta che blers monuments en l'entir pajais sajan periclitads da crudar ensemen. Il minister da cultura, Riester ha accentuà in'emna suenter il fieu che tuttas parts sensiblas da la catedrala sajan entant stabilisadas. Plinavant ha el annunzià da controllar co i stat cun la protecziun cunter il fieu en bleras catedralas da la Frantscha.
Regenza duai far dapli
Riester ha dentant er accentuà che l'incendi da al Notre-Dame n'haja da far nagut cun memia paucas investiziuns dal stadi. Numerus spezialists vesan dentant grondas mancanzas tar la finanziaziun per monuments culturals e pretendan dapli engaschament da la regenza.
Dapi decennis sa retiria il stadi adina pli fitg politicamain sco era finanzialmain da l'ierta, crititgeschan quels che han suttascrit la brev che Franceinfo ha publitgà. Cun ils daners che sajan avant maun possian ins be far las chaussas propi las pli urgentas. Per mantegnair ils monuments na tanschia dentant betg. Els pretendan uss ina sort plan d'urgenza per l'entir patrimoni cultural da la Frantscha.
RR novitads 16:00
