En ses pled ha il papa appellà a la fidanza – la fidanza en carstgauns, la fidanza tranter pievels e la fidanza tranter naziuns. Il messadi da Pasca duai sclerir la stgiradetgna en la quala il mund saja fitg savens embellida. En spezial ha il pontifex regurdà a la guerra en Ukraina.
Gida tes pievel ucranais sin la via a la pasch, sclerescha il pievel russ cun tia glisch. Consolescha ils blessads e quels che han pers persunas charezzadas e lascha turnar ils praschuniers a moda segira tar lur famiglias.
Il papa ha er pretendì da la cuminanza internaziunala da terminar la guerra en Ucraina e da s'engaschar per finir ils conflicts che contamineschian il mund cun sang. El ha er urà per autras regiuns pertutgadas da guerra, sco il Libanon e Haiti ed il Sudan.
45'000 cartentas e cartents sin plazza da son Peder
Il punct culminant da las festivitads da Pasca ha papa Francestg festivà sin la plazza da son Peder. Il chau da la Baselgia catolica ha bain stà preschent a la messa tradiziunala da Pasca, celebrà quella ha dentant Giovanni Battista Re, decan dal collegi dals cardinals. Radund 45'000 cartentas e cartents èn sa radunadas sin la plazza davant il dom da son Peder a Roma. Ensemen cun il papa che ha 86 onns han ellas ed els festivà Pasca. Il pontifex ha observà la messa per la pli gronda part en seser.
Suenter la messa è il papa vegnì manà cun il papamobil tras las massas da persunas. L'aura fraida ma sulegliva ha procurà per ina plazza bain emplenida. A chaschun da las festivitads da Pasca è la plazza da son Peder vegnida decorada cun radund 35'000 fluras e plantas. Tulipanas, narcissas e rosas èn stadas plazzadas enturn l'altar.
Notg da Pasca
En il dom da son Peder ha papa Francestg celebrà ensemen cun radund 8'000 cartentas e cartents la liturgia da la notg da Pasca ed è sa regurdà da la levada da Jesus. Quai rapporta l’agentura da novitads taliana Ansa. En ses predi ha il parsura da la Baselgia catolica crititgà l’ingiustia che sa derasia en il mund ed il vent fraid da las guerras. Il papa ha appellà da laschar passar sentiments da sconfitta. Gist la festa da Pasca cun la resurrecziun da Cristus duaja dar curaschi per l'avegnir.
Or da l'archiv
