Il schef da la societad aviatica da Hongkong, Cathay Pacific, sa retira. El surpigliass uschè la responsabladad per tge ch’è succedì las ultimas emnas, scriva la societad aviatica en ina communicaziun a las medias.
I saja endretg, sch’el surpigliass sco manader da la societad aviatica la responsabladad, sa lascha citar il CEO Rupert Hogg sez en la communicaziun. Ensemen cun el sa retira anc in auter schef da Cathay Pacific.
«Il dretg temp per novs schefs»
Las ultimas emnas sajan stadas ina gronda sfida per la societad aviatica ed i saja temp per novs schefs, scriva la societad aviatica.
La China ha mess sut squitsch Cathay Pacific perquai che persunal da l'interpresa era sa participà als protests cunter la regenza da Hongkong. Ils emploiads pertutgads na dastgan betg pli lavurar sin sgols en la China.
Cathay Pacific resta fidaivel a Peking
La Cathay Pacific terminescha sia communicaziun a las medias cun s'atschertar da star plainamain suenter il princip da la regenza chinaisa dad «In pajais dus sistems». Quai è la maxima da Peking per manar l’anteriura colonia britannica Hongkong e condemnar ils protests a Hongkong.
Quels duran gia dapi pliras emnas. Il glindesdi e mardi passà ha schizunt stuì vegnir interrut il traffic aviatic en la metropola asiatica pervi dals protests.
RR novitads 15:00
