Siglir tar il cuntegn

Header

cuntegn

Nova speranza Scienziads han pudì reproducir il virus da corona

Scienziads australians han dumagnà da reproducir il nov virus da corona en il labor. Il virus hajan ins prendì d'in pazient infectà. Il manader dal labor Doherty Institute Melbourne, Julian Druce ha discurrì d'in «success signifitgant».

Purtret da punctins nairs sin in funs grisch – il virus da corona reproducì en ina stgadiala dal labor.
Legenda: Qua è da vesair il virus da corona ch'ils Australians han reproducì en in labor a Melbourne. Keystone

Cun agid dal virus reproducì possian scienziads sviluppar in test dad anticorpuls, cun il qual pon ins lura testar pazients che na mussan anc nagins sintoms sch'els han il virus u betg. Uschia survegnian ins in maletg pli detaglià da la derasaziun dal virus ed er da la mortalitad da quel.

Er per sviluppar in vaccin saja la reproducziun dal virus d'avantatg. Regenzas, universitads e firmas da farma sin l'entir mund èn vid tschertgar in remedi cunter il virus. Quai po dentant anc cuzzar mais.

WHO parta infurmaziuns

Tar l'epidemia da SARS durant ils onns 2002 e 2003, aveva la China bain partì il genom dal virus ch'els avevan decifrà, il virus sez n'aveva Peking dentant betg mess a disposiziun a l'exteriur. Ils scienziads australians vulan dentant far quai, entras l'Organisaziun mundiala da sanadad WHO.

Dumber d'infectads crescha vinavant

Tenor la China è il dumber uffizial da persunas infectadas creschì sin radund 6'000 ed è cun quai pli aut che durant l'epidemia da SARS. Il dumber da morts è er creschì per 26 persunas sin 132, ha communitgà la regenza chinaisa. Il punct culminant da la nova malsogna da pulmuns vegn cuntanschì, tenor experts chinais, pir en radund 7 fin 10 dis. Scuvrir ed isolar ils cas d'infecziun ad uras, saja decisiv per dumagnar la situaziun.

FIS ha dà giu cursas en China

La Federaziun internaziunala da skis ha annunzià da desdir las cursas en China. Per segirezza da las atletas ed ils atlets.

Ord l'archiv da SRF:

La studenta Fabienne è serrada en a Wuhan en China pervi dal virus da corona. Ella spera sin l'agid da l'ambassada svizra per pudair turnar a chasa.

Video
Serrada en a Wuhan
Or da SRF News dals 28.01.2020.
laschar ir

RTR novitads 10:00

Dapli da Exteriuravrir la Landingpage

Nach links scrollen Nach rechts scrollen