Sonda, ils 28 da favrer en damaun, han l’Israel ed ils Stadis Unids attatgà l’Iran
- Ils Stadis Unids e l'Israel han la sonda bun'ura attatgà l'Iran. L'Iran ha reagì cun cunterattatgas en l'Israel ed en plirs Stadis da Golf arabs.
- Il manader spiritual da l'Iran Ajatollah Ali Chamenei è mort.
- Entras la bloccada da Hormus, in dals pli impurtants passadis per il commerzi d'energia global, pudess il pretsch d'ieli crescher – quai er en il Grischun.
Themen in diesem Newsticker
- Trump discurra cun Merz davart la guerra dal Proxim Orient
- Gronda Britannia trametta destruiders en Cipra
- Var 4'800 Svizzers èn anc adina bloccads en il Proxim Orient
- Nova unda d'attatgas da l'Israel a Teheran
- Var 8'000 passagiers da transit èn bloccads en il Qatar
- Dapli unfrendas en l'Iran
- Israel va en il Libanon dal Sid ed en l'Iran
- Bumbardament fa stremblar Teheran e lieus periferics
- Pretschs d'energia creschents: Stadis Unids vulan mesiras
- Suenter bumbardament: Netanjahu vesa schanza per pasch durabla
Las attatgas dals Stadis Unids: Paucs dis suenter ils davos discurs tranter l'America e l'Iran – davart il program atomar da l'Iran – han ils Stadis Unids e l'Israel cumenzà cun fermas attatgas sin miras en l'Iran – oravant tut las citads da Teheran, Isfahan, Ghom, Karadsch e Kermanschah èn stadas pertutgadas. Finamira saja da proteger la populaziun americana cun eliminar il privel entras il reschim da l'Iran. L'armada americana haja cumenzà in'acziun «massiva e durabla» per evitar che la «dictatura radicala» pericliteschia la segirtad americana. Il president american ha annunzià da destruir las rachettas ed il program atomar da l'Iran.
La rolla da l'Israel: Per l'Israel saja quai ina «attatga preventiva», ha ditg il minister da defensiun Israel Katz. Ed il primminister Benjamin Netanjahu ha confermà ch'ins veglia eliminar in «privel existenzial entras il reschim en l'Iran». L'Iran na dastgia betg survegnir ina bumba atomara.
La populaziun en l'Israel duaja restar a chasa ed igl ha era gia dà emprimas attatgas da l'Iran sin l'Israel.
Reacziun or da l'Iran: L'armada da l'Iran ha attatgà quatter basas da l'America en la regiun. Quai èn la basa Al-Udeid en il Qatar, Al-Salem en il Kuwait, la basa da l'aviatica militara Al-Dhafra en ils Emirats Arabs Unids – sco era sin la flotta americana en Bahrain. Quai rapporta l'agentura iranaisa Fars. La mort dad Ajatollah Ali Chamenei è entant vegnì confermà.
La situaziun en l'Iran: Or da l'Iran datti be paucas infurmaziuns. Las autoritads han impunì ina bloccada d'internet. L'organisaziun Netblocks, spezialisada sin bloccadas da la rait, ha rapportà ch'i saja in «disturbi d'internet quasi cumplain». In video da l'agentura da novitads Mehr ha mussà gronda destrucziun en il center da Teheran. En la chapitala sa furman lungas colonnas tar las staziuns da benzin. Bleras persunas han empruvà da fugir. Butias eran a blers lieus serradas. Las scolas sajan vegnidas serradas en coordinaziun cun l'administraziun e la polizia, ha communitgà il Ministeri da furmaziun.
Las tensiuns avant l'attatga: Las tensiuns tranter ils Stadis Unids, l'Iran ed Israel eran las ultimas emnas creschidas. Las attatgas han lieu curt suenter la davosa runda da tractativas tranter ils Stadis Unids e l'Iran. Mo paucs dis avant èn delegaziuns dals pajais s'inscuntrads a Genevra per discurs. Ils Stadis Unids avevan dentant gia avant staziunà il pli grond contingent militar en il Proxim Orient dapi l'invasiun en l'Irac. Era l'onn passà èsi gia vegnì ad attatgas da vart dals Stadis Unids e d'Israel sin installaziuns nuclearas iranaisas.