Las attatgas dals Stadis Unids: Paucs dis suenter ils davos discurs tranter l'America e l'Iran – davart il program atomar da l'Iran – han ils Stadis Unids e l'Israel cumenzà cun fermas attatgas sin miras en l'Iran – oravant tut las citads da Teheran, Isfahan, Ghom, Karadsch e Kermanschah èn stads pertutgads. Finamira saja da proteger la populaziun americana cun eliminar il privel entras il reschim da l'Iran. L'armada americana haja cumenzà in'acziun «massiva e durabla» per evitar che la «dictatura radicala» pericliteschia la segirtad americana. Il president american ha annunzià da destruir las rachettas ed il program atomar da l'Iran.
La rolla da l'Israel: Per l'Israel saja quai ina «attatga preventiva», ha ditg il minister da defensiun Israel Katz. Ed il primminister Benjamin Netanjahu ha confermà ch'ins veglia eliminar in «privel existenzial entras il reschim en l'Iran». L'Iran na dastgia betg survegnir ina bumba atomara.
La populaziun en l'Israel duaja restar a chasa ed igl ha era gia dà emprimas attatgas da l'Iran sin l'Israel.
Reacziun or da l'Iran: L'armada da l'Iran ha attatgà quatter basas da l'America en la regiun. Quai èn la basa Al-Udeid en il Qatar, Al-Salem en il Kuwait, la basa da l'aviatica militara Al-Dhafra en ils Emirats Arabs Unids – sco era sin la flotta americana en Bahrain. Quai rapporta l'agentura iranaisa Fars. Ajatollah Ali Chamenei saja en segirtad, rapporta in commember da la regenza. Ed era il president da l'Iran vivia.
La situaziun en l'Iran: Or da l'Iran datti be paucas infurmaziuns. Las autoritads han impunì ina bloccada d'internet. L'organisaziun Netblocks, spezialisada sin bloccadas da la rait, ha rapportà ch'i saja in «disturbi d'internet quasi cumplain». In video da l'agentura da novitads Mehr ha mussà gronda destrucziun en il center da Teheran. En la chapitala sa furman lungas colonnas tar las staziuns da benzin. Bleras persunas han empruvà da fugir. Butias eran a blers lieus serradas. Las scolas sajan vegnidas serradas en coordinaziun cun l'administraziun e la polizia, ha communitgà il Ministeri da furmaziun.
Las tensiuns avant l'attatga: Las tensiuns tranter ils Stadis Unids, l'Iran ed Israel eran las ultimas emnas creschidas. Las attatgas han lieu curt suenter la davosa runda da tractativas tranter ils Stadis Unids e l'Iran. Mo paucs dis avant èn delegaziuns dals pajais s'inscuntrads a Genevra per discurs. Ils Stadis Unids avevan dentant gia avant staziunà il pli grond contingent militar en il Proxim Orient dapi l'invasiun en l'Irac. Era l'onn passà èsi gia vegnì ad attatgas da vart dals Stadis Unids e d'Israel sin installaziuns nuclearas iranaisas.