L'Egipta ha gidà a negoziar il stop dals cumbats tranter l'Israel e la Hamas radical-islamica. Omaduas partidas han dentant avertì, che la pausa da cumbat scadia sche la cuntrapart na sa tegnia betg vi da la cunvegna cuminaivla.
Il secretari general da las Naziuns unidas Antonio Guterres ha beneventà la pausa da cumbat, ed ha appellà ad omaduas varts da respectar quella. Ed era il president american Joe Biden ha beneventà la cunvegna. Israelians sco era Palestinais hajan il dretg sin ina veta segira, libra, en bainstonza e democratica. Uss saja uras da nizzegiar la schanza per ina pasch a lunga vista.
Cumenzà han ils cumbats ils 10 da matg – fin uss èn mortas 232 persunas en la Strivla da Gaza, e 12 en l’Israel. I sa tracta dals pli grevs cumbats dapi onns en il Proxim Orient.