Il sistem politic en Frantscha prevesa ch'i dat u ina clera opposiziun u ina clera maioritad per la regenza – pia dus blocs. Actualmain datti dentant trais blocs – in sanester, in dal center ed in conservativ / da la dretga.
Accentuà questa spartida ha il president Emmanuel Macron cun las elecziuns anticipadas dal 2024. Sia partida ha pers sezs e la separaziun è vegnida pli clera. Quai di la correspundenta da SRF Mirjam Mathis en il discurs cun RTR.
En la situaziun actuala, senza ina clera regenza d'opposiziun, ha il president franzos enorma pussanza – el decida da princip co vinavant. Ma Macron stuess far in pass enavant, di Mirjam Mathis. El haja uss trais giadas empruvà da plazzar in primminister or da ses agen conturn politic – malgrà ch'il bloc sanester ha gudagnà il pli ferm tar las davosas elecziuns. E quellas partidas pretendan era in primminister sanester.
I na saja era betg garantì ch'in primminister da la sanestra avess success – i fiss dentant in pass enavant e sche quel faschess era naufragi in signal per tuttas partidas, da midar insatge vi dal sistem, di Mirjam Mathis che rapporta dapi il 2022 or da la Frantscha.
Sa fitgar sin l'atgna posiziun
Il problem è ch'i na dat nagina cultura da cumpromiss. Enfin uss han ils blocs politics adina insistì sin l'atgna posiziun.
U ch'ins è per u cunter ina chaussa. I na vegn betg discutà sur ils cunfins da l'agen bloc ora.
Prevesair co ch'i va uss vinavant è fitg grev. Macron n'ha fin uss betg mussà la veglia da midar insatge, tenor Mathis stuess dentant el fa l'emprim pass. Alura pudessan era las partidas realisar ch'i dat la pussaivladad da far cumpromiss.