Siglir tar il cuntegn

Header

cuntegn

Stadis Unids Trump sto far frunt al «impeachment»

Il president american Donald Trump sto sco terz president en l'istorgia dals Stadis Unids far frunt ad ina procedura da relaschada en il senat american. La chombra dals represchentants ha vuschà ier saira, d'avrir uffizialmain ina tala procedura d'impeachment.

Donald Trump
Legenda: Sco terz president suenter Bill Clinton il 1998 e Richard Nixon il 1974 sto Trump far frunt ad ina procedura da relaschada. Keystone
  • Il president american Donald Trump sto far frunt ad ina procedura da relaschada en il senat american.
  • Per l'ina vegn renfatschà a Trump maldiever da la pussanza, per l'autra duai el avair impedì retschertgas dal senat.
  • Trump è pir il terz president american, che sto far frunt a l'impeachment.

Ils represchentants han per gronda part vuschà confurm a la lingia da partida. Quai èn omadus puncts da renfatscha. Els han fatg quai cun 230 vuschs cunter 197 vuschs per l'emprim punct d'accusaziun (maldiever da pussanza) e cun 229 cunter 198 per il segund punct (impediment d'investigaziuns).

Las renfatschas

Personen-Box aufklappenPersonen-Box zuklappen

A Trump vegn renfatschà abus da pussanza e d'avair impedì investigaziuns en il congress. El duai avair intimà ses collega d'uffizi, il president da l'Ucraina Wolodimir Selenski, d'investigar envers ses rival politic Joe Biden. Quai per influenzar las elecziuns presidialas il 2020.

Per ils democrats dettia avunda mussaments, ch'el haja tegnì enavos sustegn militaric per l'Ucraina sche Selenski n'investigheschia betg envers Biden. Cura che quai saja vegnì public haja Trump fatsch tut il pussibel per impedir las investigaziuns da la chasa da represchentants. Trump contesta las renfatschas.

Avant la decisiun istorica han ils deputads discutà e dispità durant bunamain 12 uras. Ils democrats han argumentà lur decisiun d'avrir ina procedura penala cunter Trump cun l'obligaziun da proteger la constituziun americana. Trump saja in privel per la democrazia, la proxima elecziun e la segirezza naziunala da l'America. Ils republicans percunter han renfatschà als democrats che la procedura saja mo calcul politic. Els sajan gia dapi l'entschatta dal presidi da Trump obsessiunads da l'impeachment.

Trump ha reagì durant ina ralley

Il president ha renfatschà en vista a l'impeachment als democrats da vulair annullar sia victoria dal 2016. Ils «radicals da la sanestra» sajan scuidus sin el.

Video
Trump: «Nus n'avain fatg nagut fallà» (engl.)
Or da News-Clip dals 19.12.2019.
laschar ir

En in'emprima reacziun condemna la Chasa alva che la procedura d'allontanar Donald Trump da ses uffizi è uss averta. La pledadra dal president ha numnà la decisiun da la chasa dals represchentants, ina farsa che cuntrafetschia a la constituziun. Trump saja segir d'avair en il senat in process fair che distgargia el dal tut.

Cura che la procedura en il senat cunter Donald Trump cumenza n'è betg propi cler. En il senat vegn l'impeachment dentant ad avair grev. Damai che la partida da Trump ha la maioritad en la chombra pitschna èsi pauc probabel ch'il president perda a la fin propi ses uffizi.

RTR novitads 06:00