La glista dals pajais che vegnan visitads il pli savens maina dapi decennis la Frantscha. Er il 2024 è noss pajais vischin stà il pli popular per far vacanzas.
- Frantscha: L'onn passà han bun 102 milliuns turistas e turists visità la Frantscha.
- Spagna: Prest 94 milliuns giasts, radund 10 milliuns dapli ch'avant corona han ins dumbrà en Spagna. L'ultim temp hai però er adina puspè dà demonstraziuns pervia da l'uschenumnà «overtourism».
- Stadis Unids da l'America: 72,4 milliuns visitadras e visitaders han ils Stadis Unids registrà l'onn passà. Il 2019 avevan ils Stadis Unids anc registrà dapli giasts, lura bunamain 80 milliuns. La politica dal president Donald Trump pudess avair l'effect che pli paucas persunas visitan en l'avegnir l'America.
- Tirchia: In plus da giasts da vacanzas ha la Tirchia nudà. Bunamain 10% dapli han visità il pajais, en tut èn quai stadas 60,6 milliuns persunas.
- Italia: Noss pajais vischin en il sid ha gì il 2024 57,7 milliuns visitadras e visitaders. Record n'è quai però betg, avant corona il 2019, avevan bunamain 65 milliuns persunas fatg vacanzas en l'Italia.
- Mexico: Dapi in temp è Mexico ina destinaziun da trend per far vacanzas, vegnida enconuschenta er entras influencers. L'onn passà han 45 milliuns persunas visità Mexico, quai è in plus da 7,4%.
- China: Malgrà ch'i dat naginas cifras uffizialas mabain be stimaziuns è la China sin plaz 7 da la rangaziun. Cunzunt Peking, il mir chinais e la gastronomia attiran bleras visitadras e visitaders.
- Gronda Britannia / Reginavel Unì: Er qua datti anc naginas cifras uffizialas. Tenor stimaziuns han però 39 milliuns persunas visità il Reginavel Unì. Cunzunt citads sco Londra, Edinburgh, Oxford u Cambridge attiras bleras persunas.
- Germania: Er la Germania ha fatg il plaz tranter las top 10 destinaziuns da vacanzas. L'onn passà han 37,5 milliuns persunas fatg vacanzas u visità la Germania.
- Giapun: In grond sigl en la glista da destinaziuns turisticas popularas ha il Giapun fatg. Gist 47% dapli giasts ha il pajais asiat registrà, en tut han 36,9 milliuns turistas e turists fatg visita. Er la flaivlezza dal Yen haja contribuì a quai svilup, uschia èn vacanzas en il Giapun vegnidas pli pajablas.
E nua è la Svizra?
La rangaziun d'arrivadas internaziunala mussa las 20 destinaziun da vacanzas las pli popularas. La Svizra na figurescha betg tranter quellas. Sin tge rang exact che la Svizra sa chatta, n'è uschia betg cler. Il 2023 era la Svizra sin rang 30 da la glista.