Societad Movimento - Co èn las vacanzas a Mallorca stadas?

La societad Movimento organisescha mintg’onn in’emna speziala per sias clientas e ses clients. Quest onn ha la manadra da Samedan, Seraina Camichel, organisà in’emna vacanzas a Mallorca per las clientas ed ils clients da tut ils trais lieus Samedan, Poschiavo e Scuol. En tut èn 47 persunas cun in impediment e 17 tgiradras e tgiraders sgulads a la mar a Mallorca.

«Last minute» – per il vair senn dal pled

Bunamain sin l’ultima minuta ha la gruppa da 64 persunas anc savì embartgar en l’aviun per sgular da Turitg a Mallorca. Quai causa ch’il check-in ha duvrà bler dapli temp che planisà. In avantatg dentant per tut quels e quellas ch’avevan dubis u perfin tema da sgular, ha declerà l’organisatur dal viadi da Movimento, Seraina Camichel.

Ils clients e las clientas cun lur tgirunzas e tgirunzs èn finalmain arrivads bain a l’hotel. Dentant haja gia spetgà l’emprima nauscha surpraisa: «Cura che nus essan arrivads a l’hotel, n’ha l’ascensur betg funcziunà. Ina detga sfida per transportar tut la bagascha e per part er ils clients sin lur chombras. In client avain nus gì da quartier en in hotel daspera, di Seraina Camichel.

Il giudiment percunter è mintgadi grond tar tuts, surtut per star en ed enturn il pool. Cura che la gruppa da l’Engiadina è là, sajan tut ils giaschaditschs occupads. Sper il far il bogn, tranteren er en la mar, datti in program cun excursiuns da tut il gener. Per exempel en l’aquarium u er ad in martgà.

Ils dis sajan intensivs e fineschan pir la saira suenter trategniment tradiziunal cun disco. Ils 47 clients e clientas da Movimento giaudan in mez mund, cuntinuescha Seraina Camichel. Els hajan gia dumandà nua ch’els giajan l’onn proxim.

In onn organisaziun

L’organisaziun per quest viadi saja stada ina gronda sfida: «Jau era surstada ch’igl è anc adina uschè difficil d’organisar vacanzas per persunas cun in impediment.», ha ditg Seraina Camichel.

Avant in onn ha ella numnadamain cumenzà ed è adina puspè vegnida als cunfins. Oravant tut l’empustaziun dal sgol haja chaschunà rumpatesta. Finalmain hajan ins però chattà ina airline che lascha sgular tantas persunas cun in impediment.

La societad Movimento haja decis conscientamain da pussibilitar vacanzas a la mar a lur clientas e clients. Blers dad els n’hajan uschiglio numnadamain betg la pussaivladad da pudair sgular davent. Er sche l’organisaziun ed il viadi sajan ina gronda sfida, è Seraina Camichel persvadida che in e mintgina po giudair in’emna il «dolce far niente» a Mallorca.

Or da l'archiv:

Tge barrieras datti anc en il mintgadi? Quant lunsch è l’inclusiun? Tge experientschas fan las persunas en lur vita?

RTR ha il 2023 rapportà durant duas emnas davart persunas cun impediments. Ellas han raquintà da lur mintgadi ed il viver cun in impediment.

Dapli inclusiun