A Roma ha papa Francestg festivà sin la plazza da son Peder a Roma la gronda messa da la dumengia da Pasca. Quai en preschientscha da dieschmillis da cartentas e cartents.
En ses messadi da Pasca tradiziunal è il papa s'exprimì davart ils divers conflicts actuals sin il mund. Uschia ha el ditg ch'agid umanitar stoppia esser pussaivel en la guerra da la Strivla da Gaza. E tut las partidas involvidas stoppian s'engaschar per ina pausa da cumbat. Silsuenter ha papa Francestg dà la benedicziun tradiziunala «Urbi et Orbi».
Appel a la legria ed a la speranza la sonda
En il dom da son Peder ha papa Francestg celebrà ensemen cun radund 6'000 cartentas e cartents la levada da Jesus. En ses predi ha il parsura da la Baselgia catolica appellà a la legria ed a la speranza. Las bleras crisas en il mund sajan sco crappuns, ha ditg il papa. El è sa referì al crap ch'ha tenor la tradiziun cristiana cuvert la fossa da Jesus. Tals craps da fossa sentian er ils umans mintgatant. Quels serrian ils cors e blocheschian la via a la speranza. La festa da Pasca possia dentant stuschar davent quels craps, uschia il papa.
